काठमाडौं । हिंसात्मक विरोध प्रदर्शनका बीच अमेरिकाको दोस्रो ठूलो सहर लस एन्जलसमा कर्फ्यु लगाइएको छ। लस एन्जलसकी मेयर करेन बासले मंगलबार कर्फ्युको घोषणा गरेकी हुन्।
यसका साथै मेयर बासले अमेरिकी राष्ट्रपति डोनाल्ड ट्रम्पलाई छापा मार्ने काम रोक्न आग्रह गरेकी छन्। ‘मैले स्थानीय आपतकाल घोषणा गरेको छु र तोडफोड र लुटपाट रोक्न लस एन्जलसको सहरमा कर्फ्यु जारी गरेको छु’, मिडियालाई सम्बोधन गर्दै मेयर बासले भनिन्, ‘म डोनाल्ड ट्रम्पलाई छापा मार्ने काम रोक्न अपिल गर्छु।’
मेयर बासले कर्फ्यु मंगलबार राति ८ बजेदेखि बुधबार बिहान ६ बजेसम्म (स्थानीय समय) लागू हुनेछ। उनले भनिन्, ‘सहरको १ वर्गमाइल (२.५९ वर्गकिलोमिटर) क्षेत्रमा कर्फ्यु लागू हुनेछ। जसमा शुक्रबारदेखि विरोध प्रदर्शन भइरहेको क्षेत्र पनि समावेश छ।’
ट्रम्प प्रशासनले आप्रावासीविरुद्ध थालेको देश निकालापछि लस एन्जलसमा हिंसात्मक प्रदर्शन भइरहेको छ। सोही प्रदर्शनको फाइदा उठाउँदै केही समूहले लुटपाट मच्चाएका छन्।
मेयर बासका अनुसार सहरका २३ व्यावसायिक स्थानमा लुटपाटका घटना भएको जानकारी आएको छ। –एजेन्सी
