काठमाडौं । विश्वमा धनीव्यक्तिहरुको संख्या निरन्तर बढिरहेको छ र उनीहरुमध्ये धेरैले कम उमेरमै यो स्थानमा पुग्न सफल भएका छन्।
यदि हामी सबैभन्दा कम उमेरमा अर्बपतिहरुको सूचीमा समावेश हुने व्यावसायिक क्षेत्रका दिग्गजहरुका बारेमा कुरा गर्छौं भने मेटा–फेसबुकका सीईओ मार्क जुकरबर्गको नाम शीर्षमा आउँछ। जो केवल २३ वर्षको उमेरमा अर्बपतिहरुको सूचीमा सामेल भएका थिए। साथै, मनोरञ्जनदेखि खेलकुद क्षेत्रका सेलिब्रेटीहरु पनि यसमा समावेश छन्।
द वर्ल्ड अफ स्ट्याटिस्टिक्सले विभिन्न क्षेत्रमा काम गर्ने विश्वका यस्ता अर्बपतिको सूची जारी गरेको छ। जसले सबैभन्दा कम उमेरमा अर्बपतिहरुको सूचीमा आफ्नो नाम दर्ता गरेका छन्। उनीहरुमध्ये धेरैजसो अब विश्वको शीर्ष–१० अर्बपतिहरुको सूचीमा पनि समावेश छन्।
मार्क जुकरबर्ग २३ वर्षको उमेरमा अर्बपति बनेका थिए र हाल विश्वको तेस्रो धनीव्यक्ति हुन्। ब्लुमबर्ग बिलियनेर्स इन्डेक्सका अनुसार जुकरबर्गको कुल सम्पत्ति २६३ अर्ब डलर छ।
सूचीमा अर्को नाम इभान थोमस स्पीगलको हो। जो एक अमेरिकी व्यापारी र स्न्याप इंकका सीईओ तथा सहसंस्थापक हुन्। उनी पनि २५ वर्षको उमेरमा अर्बपति बने।
तेस्रो र चौथो कान्छा अर्बपतिहरु ल्यारी पेज र सर्गेई ब्रिन हुन्। जो गुगलका सहसंस्थापक हुन्। उनीहरु सन् १९९८ मा स्ट्यानफोर्ड विश्वविद्यालयमा पीएचडी गर्दा भेटे र त्यसपछि गुगल स्थापना गरे।
सन् २०१५ मा पेज र ब्रिनले अल्फाबेट डट इन्क नामक एक अभिभावक कम्पनी गठन गरे। जसमा गुगल, नेस्ट, क्यालिस्को र अन्य कम्पनी समावेश छन्।
ल्यारी पेज ३० वर्षको उमेरमा अर्बपति बने भने सर्गेई ब्रिन ३१ वर्षको उमेरमा अर्बपतिको सूचीमा प्रवेश गरे। विशेष कुरा के छ भने दुवै हाल विश्वका शीर्ष १० धनीव्यक्तिहरुको सूचीमा समावेश छन्। ल्यारी पेज १७० अर्ब डलरको कुल सम्पत्तिका साथ छैटौँ धनी हुन् जब कि सर्गेई ब्रिन १५९ अर्ब डलरको कुल सम्पत्तिका साथ सातौँ स्थानमा छन्।
वर्ल्ड अफ स्ट्याटिस्टिक्सको तथ्यांकअनुसार यो सूचीमा अन्य ठूला नामहरुमा माइक्रोसफ्टका सहसंस्थापक बिल गेट्स ३१ वर्षको उमेरमा, गायिका रिहाना ३३ वर्षको उमेरमा, खेलकुद क्षेत्रका टाइगर वुड्स पनि ३३ वर्षको उमेरमा अर्बपति बने। ३५ वर्षको उमेरमा जेफ बेजोस, ३८ वर्षको उमेरमा स्टिभ बाल्मर र आज विश्वका सबैभन्दा धनी व्यक्ति एलन मस्कले ४१ वर्षको उमेरमा अर्बपतिहरुको सूचीमा आफ्नो नाम समावेश गरेका छन्। –एजेन्सी
