काठमाडौं । सिंगापुरको सस्तो मूल्य आधारित वायुसेवा प्रदायक जेटस्टार एसिया (३के)ले आगामी जुलाई ३१ देखि सम्पूर्ण उडान बन्द गर्ने भएको छ। अन्य वायुसेवा प्रदायकभन्दा सस्तो मूल्यमा उडान सेवा दिँदै आएको यो कम्पनी सञ्चालन खर्च धान्न नसक्ने भएपछि बन्दको संघारमा पुगेको हो।
सन् २००४ देखि सञ्चालनमा आएको यो वायुसेवा कम्पनी दुई दशक लामो यात्रा पूरा गर्दै अन्ततः सधैँका लागि बन्द हुनेछ। जेट स्टारको यो निर्णयले सिंगापुरमा आधारित रहेर उडान सेवा दिँदै आएको जेट स्टार एसियाको सेवालाई मात्र असर गर्नेछ। अस्ट्रेलिया र दक्षिणपूर्व एसिया र जेट स्टार जापान (जीके) बीचको जेटस्टार एयरवेज (जेक्यू) उडानहरुसहित अन्य जेट स्टार ब्रान्डहरुले नियमित रुपमा सञ्चालन जारी राख्नेछन्।
जेट स्टार एसियाले हालैका वर्षहरुमा बढ्दो चुनौतीहरुको सामना गरेको छ, जसमा आपूर्तिकर्ता र विमानस्थल लागतमा वृद्धि, साथै यस क्षेत्रका अन्य बजेट वाहकहरुबाट बढ्दो प्रतिस्पर्धा समावेश छ। यी दबाबलाई व्यवस्थापन गर्ने प्रयासहरुको बाबजुद एयरलाइन्सले अब दिगो रुपमा सस्तो भाडा थेग्न नसक्ने जनाएको छ। ‘यो अविश्वसनीय रुपमा गाह्रो समाचार हो’, एयरलाइन्सले विज्ञप्ति जारी गर्दै भनेको छ, ‘उडान सेवा बन्दबाट प्रभावित हुने यात्रुलाई सहयोग र विकल्पहरु प्रदान गर्ने वाचा गरेको छ।’
उडानहरु जुलाई ३१ मा सञ्चालनको अन्तिम दिनसम्म जारी रहनेछन्। तर, बन्द हुनुभन्दा अगाडि तालिका विस्तारै घटाइनेछ। यदि उडान जुलाई ३१ भन्दा अगाडिको हो र यात्रुलाई कुनै परिवर्तनका बारेमा जानकारी गराइएको छैन भने यात्रा उडान तालिकाअनुसारै हुनेछ।
यदि तालिका परिवर्तनको बारेमा सम्पर्क गरिएको छ भने एयरलाइन्सले आवश्यकताअनुसार पुनः बुकिङ वा फिर्ता प्रस्ताव गर्नेछ। यदि उडान जुलाई ३१ पछिको हो भने टिकटबापतको सम्पूर्ण रकम फिर्ता गरिने जेट स्टारले विज्ञप्तिमार्फत जानकारी दिएको छ।
जेट स्टार एसियाले सिंगापुरबाट बैंकक, मनिला, जकार्ता, क्वालालम्पुर र डेनपासर सहित दक्षिणपूर्व एसिया, दक्षिण एसिया, पूर्वी एसिया र अस्ट्रेलियाका सहरहरुमा उडान गर्दै आएको थियो । यो प्रस्थानले दक्षिणपूर्वी एसियाको उल्लेखनीय बजेट बाहकहरुमध्ये एकका लागि एक युगको अन्त्यलाई चिह्न लगाउँछ।
विशेष गरी फुर्सदका यात्रीहरु र विदेशी कामदारहरुका लागि जेट स्टार एसियाले एकपटक यस क्षेत्रमा किफायती यात्रा विकल्पहरु विस्तार गर्न प्रमुख भूमिका खेलेको थियो।
सिंगापुरको वायुसेवा क्षेत्रमा पछिल्लो समयमा जेटस्टारसँग प्रतिस्पर्धा गर्दै सस्तो मूल्यको हवाई टिकट बिक्री गर्ने अन्य वायुसेवा कम्पनीसमेत सञ्चालनमा आएका छन्। तीव्र प्रतिस्पर्धाका बीच चुलिँदो घाटाले अन्ततः यो कम्पनी बन्द हुने अवस्थामा आइपुगेको हो।
