काठमाडौं । लक्ष्मी बैंकले ग्राहकको खाता आफैले बन्द गरेको छ । ताप्लेजुङमा सिदिङ्मा शाखामा रहेको खाता बैंक आफैले बन्द गरिदिएको खुलेको छ । रोचक कुरा चाही के छ भने काठमाडौंको हात्तिसारमा रहेको मुख्य शाखा कार्यालयमा सेवाग्राही आफै उपस्थित भएर खोलेको खाता ०९३ कोड राखित ताप्लेजुङको सिदिङ्मा शाखामा पुर्याइएको थियो ।
दुई वर्ष अघि खोलिएको खाता बैंक आफैले हठात बन्द गरिदिएको पत्ता लागेको छ । बैंकको सिदिङ्मा शाखाका एक कर्मचारीले खाता बैंक आफैले बन्द गरेको स्वीकार गरेका छन् । सिदिङ्मा शाखाले दिएको जानकारी अनुसार खाता सञ्चालकले कारोबार नगरेको कारण उक्त खाता बन्द गरिएको जानकारी दिएका छन् ।
यता, पीडित (नाम गोप्य, खाता नं ०९३४८००७०….. ) ले भने बैंकले आफुखुशी खाता बन्द गरेर अन्याय गरेको गुनासो गरेका छन् । सामाजिक भत्ताको लागि खोलेको खाता नै बन्द भएपछि पीडितलाई सोही बैंकमा पुनः खाता खोल्न लगाइएको छ । सामाजिक भत्ता सरकारले बैंकमार्फत भुक्तानी गर्ने व्यवस्था गरेको र ताप्लेजुङको सिदिङ्मा गाउँपालिकाले सामाजिक भत्ता लिन लक्ष्मी बैंकमा खाता खोल्न अनिवार्य गरेकोले पुनः खाता खोल्नु पर्दा दोहोरो झन्झट व्यहोर्नु परेको र लकडाउनको समयमा बैंकको शाखा कार्यालयमा जान बाध्य भएको गुनासो गरेका छन् ।
नियम अनुसार बैंकले ग्राहकको खाता आफुखुशी बन्द गर्न पाउँदैनन् । खाता बन्द गर्नुअघि सञ्चालकको अनुमति लिन अनिवार्य छ ।
