काठमाडौं । गत बैशाख ७ गतेबाट सुरु भएको कोरोना बीमाको दावी भुक्तानी एक करोड नजिक पुगेको छ । हालसम्म ८६ जनाको कोरोना बीमा दावी परेको छ ।
बीमा पुलको व्यवस्थापक शिखर इन्स्योरेन्सको सिईओ तथा नेपाल बीमक संघका अध्यक्ष दीप प्रकाश पाण्डेले दिएको जानकारी अनुसार हालसम्म ३१ लाख ५० हजार दावी भुक्तानी भइसकेको छ भने ५४ लाख दावी भुक्तानीको प्रक्रिया पाइपलाइनमा छ ।
अध्यक्ष पाण्डेले बुधबार दिएको जानकारी अनुसार एक लाख बीमाङ्कको ३१ जनाले दावी भुक्तानी लिईसकेका छन् भने ५० हजार बीमाङ्कको एक जनाले दावी भुक्तानी बुझेका छन् । अध्यक्ष पाण्डेले ५४ जनाले कोरोना बीमा गरेपछि कोरोना संक्रमति भएको भन्दै बीमा दावी भुक्तानीको लागि आवेदन दिएको बताए । हाल पाइपलाईनमा रहेकाहरुलाई भुक्तानी दिईसक्दा कोरोना बीमाको दावी भुक्तानी एक करोड नजिक अर्थात ८५ लाख पुग्नेछ ।
अध्यक्ष पाण्डेले हालसम्म कोरोना बीमा गर्नेको संख्या छ लाख १५ हजार नाघेको बताउँदै कूल ३४ करोड ६१ लाख रुपैयाँ बीमा शुल्क संकलन भएको बताए । कोरोना बीमा पुलमार्फत सञ्चालन हुँदै आएको छ । यसको व्यवस्थापन भने शिखर इन्योरेन्स कम्पनीले गरिरहेको छ ।
