काठमाडौं । सरकारले चालु आर्थिक वर्षको बजेटमार्फत घोषणा गरेको सरकारी कर्मचारीलाई निःशुल्क कोरोना बीमा र सर्वसाधारणको लागि ५० प्रतिशत छुटमा कोरोना बीमा कार्यक्रम आजबाट औपचारिक रुपमा लागू हुँदैछ । बीमा समितिले आज अपरान्ह २ बजे पत्रकार सम्मेलन गरेर सहुलियत कोरोना बीमाको औपचारिक रुपमा सुरुवात गर्न लागेको हो ।
अर्थमन्त्रालयले हिजो सो सम्बन्धी कार्यविधि स्वीकृत गरेपछि बीमा समितिले आजदेखि सरकारी कर्मचारीलाई निःशुल्क कोरोना बीमा र सर्वसाधारणको लागि ५० प्रतिशत अनुदानमा कोरोना बीमा गर्ने व्यवस्थाको औपचारिक घोषणा गर्न लागेको जनाएको छ ।
हाल २० वटै बीमा कम्पनीले बीमा पुलमार्फत कोरोना बीमा सञ्चालन गर्दै आएको छ । कोरोना बीमा दुई प्रकारका छन् । व्यक्तिगत रुपमा बीमा गर्दा एक लाख रुपैयाँ बीमाङ्कको लागि एक हजार र परिवार तथा संस्थागत बीमा गर्दा एक लाख रुपैयाँ बीमाङ्कको लागि ६०० तथा ५० हजारको लागि सो को आधा रकम बीमा शुल्क तोकिएको छ । आजबाट निजामती सेवामा कार्यरत करिब छ लाख कर्मचारीहरुको कोरोना बीमा निःशुल्क हुनेछ भने सर्वसाधारणले तोकिएको दर रेटमा ५० प्रतिशत अनुदान पाउनेछन् ।
