एजेन्सी : भारतका बीमा कम्पनीहरुले म्यादी जीवन बीमा तर्फको प्रिमियम रकमलाई वृद्धि गर्दै लगेका छन् । पोलिसी बजार डट कमबाट प्राप्त तथ्याङ्क अनुसार मार्च देखि जुलाई महिनाको बीचमा आईसीआईसीआई प्रुडिन्सियल लाईफ, टाटा एआईए र बजाज एलियाञ्ज लाईफले म्यादी जीवन बीमा तर्फको प्रिमियम रकम क्रमश ३७ प्रतिशत, ३२ प्रतिशत र ३६ प्रतिशतले वृद्धि गरेका छन्।
पुनर्बीमा कम्पनीहरुले महङ्गो दरमा पुनर्बीमा गर्ने गरेको कारणले गर्दा म्यादी जीवन बीमा तर्फको प्रिमियम महँगो भएको हो । त्यस्तै भारतमा केही वर्ष यता प्रक्षेपित मृत्यु दावी भन्दा पनि धेरै नै दावी आउँन थालेकोले प्रिमियम महँगो हुनुको अर्को कारण रहेको छ र मार्च महिना देखि घट्दो व्याज पनि एउटा अर्को कारण रहेको छ।
म्यादी बीमा तर्फको प्रिमियम वृद्धि भए पनि म्यादी जीवन बीमा तर्फ भारतका बीमा कम्पनीहरुले राम्रै व्यापार गरेका छन् । कोरोना भाइरसको कारणले बीमा क्षेत्र तर्फ जनचेतनाको स्तर वृद्धि हुन थालेसँगै प्रिमियम महँगो भए पनि व्यापारमा कुनै असर नपर्ने कुरामा भारतका जीवन बीमा कम्पनीहरु विश्वस्त छन् ।
