काठमाडौं । देशको शान्ति सुरक्षा र अमन चयनको जिम्मेवारी पाएको नेपाल प्रहरी कोभिड भाइरस रोकथाम तथा नियन्त्रणमा समेट दिलोज्यान दिएर खटिइरहेको छ । तर, जनताको सुरक्षामा खटिने प्रहरीहरुको हेडक्वाटर नै कोरोनाको इपिसेन्टरमा रुपान्तरण भएको छ ।
आज प्राप्त रिपोर्ट अनुसार नेपाल प्रहरीको हेडक्वार्टरमा कार्यरत थप २३ जनामा कोरोना संक्रमण पुष्टि भएको छ । नेपाल प्रहरीका प्रवक्ता निरजबहादुर शाहीले २३ जनामा संक्रमण पुष्टि भएको जानकारी दिएका छन् । यसअघि हेडक्वाटरमै कार्यरत चार जना प्रहरीमा कोरोना देखिएको थियो ।
राजधानी काठमाडौंमा रहेको प्रहरी मुख्यालयभित्रै कोरोना भाइरसको संक्रमण देखिएपछि राजधानी काठमाडौं स्थानीय तहमा कोरोना भाइरस फैलिसकेको हुनसक्ने आशंका गरिएको छ । आज थप प्रहरीमा कोरोना भाइरस भेटिएसँगै राजधानीमा कोरोना त्रास झनै बढेको छ ।
यसैबीच, सरकारले कर्मचारीहरुको निःशुल्क कोरोना बीमा गर्ने घोषणा चालु आवको बजेटमा गरेको भएपनि कार्यान्वयनमा आईनसकेकोले कोरोनाबाट प्रभावित प्रहरी कर्मचारीहरुले कोरोना बीमाको सुविधा नपाउने भएका छन् । सरकारले कोरोना बीमा सम्बन्धी कार्यविधि बनाई लागू गर्न ढिलाई गरेका कारण बजेटमा उल्लेख भएको कोरोना बीमा सुविधाबाट सरकारी कर्मचारी र प्रहरी सुरक्षाकर्मीहरु बञ्चित भएका हुन् ।
