काठमाडौं । नेपाल राष्ट्र बैंकले आज सार्वजनिक गरेको मौद्रिक नीतिमा बैंकास्योरेन्स शब्द नपरेपछि लामो समयदेखि लविङ गर्दै आएका बैंकरहरु भने जिल्लिएका छन् । बाणिज्य बैंक, विकास बैंकको छाता संगठनहरुले बैंकास्योरेन्स खुल्ला गर्न चर्को लविङ गर्दै आएका थिए । दुवै संघले राष्ट्र बैंकलाई बुझाएको सुझावमा बैंकास्योरेन्स खुल्ला गर्नुपर्ने पहिलो सुझावमा समेटेका थिए । साथै डेपुटी गभर्नर चिन्तामणि सिवाकोटीमार्फत बैंकास्योरेन्स खुल्ला गर्न चर्को दवाव दिएका थिए ।
बैंकरसँगै केही बीमा कम्पनीका अधिकारीहरुले समेत बैंकास्योरेन्स खुल्ला पक्षमा लविङ गरेको भएपनि राष्ट्र बैंकले अस्वीकार गरिदिएको छ ।
आज जारी केन्द्रीय बैंकले जारी गरेको मौद्रिक नीतिमा बैंकास्योरेन्स सम्बन्धी कुनै व्यवस्था नगरेपछि गत वर्ष साउन २२ गते जारी गरेको निर्देशन अनुसार नै बैंकास्योरेन्स खारेज कायम रहन पुगेको छ । गत वर्षको मौद्रिक नीतिमार्फत खारेज गरिएको बैंकास्योरेन्सलाई राष्ट्र बैंकले यस वर्ष पनि निरन्तरता दिएपछि अभिकर्ताहरु भने खुशी देखिएका छन् । पेशागत अभिकर्ता संघका अध्यक्ष नन्द प्रसाद तिवारीले अभिकर्ताहरुको निरन्तरको खवरदारी र राष्ट्र बैंकका अधिकारीहरुको जिम्मेवारीपूर्ण व्यवहारको कारण बैंकास्योरेन्स खारेजलाई यस वर्ष निरन्तरता दिइएकोमा खुशी व्यक्त गरेका छन् ।
