काठमाडौं । गत वर्षदेखि बन्द गरिएको बैंकास्योरेन्स यस वर्ष मौद्रिक नीतिबाट पुनः खोल्ने सम्बन्धमा राष्ट्र बैंकमा छलफल सुरु भएको छ ।
नेपाल राष्ट्र बैंकका प्रबक्ता गुणकर भट्टले बैंकहरुले बैंकास्योरेन्स खुल्ला गर्नुपर्ने सुझाव पेश गरेको र प्राप्त सुझावमाथि छलफल हुनु केन्द्रीय बैंकको नियमित कार्य भएको बताए । वाणिज्य तथा विकास बैकहरूले यस वर्ष बैंकास्योरेन्स खुल्ला गर्न चर्को लबिङ गरिरहेका छन् भने नयाँ बीमा कम्पनीहरुले समेत खोल्नुपर्ने सुझाव केन्द्रीय बैंकमा बुझाएका छन् । पछिल्लो समय बीमा समितिले समेत अनौपचारिक रुपमा बैंकास्योरेन्स खोल्नुपर्ने भन्दै लबिङ गरेको सूत्रहरुले जनाएको छ ।
राष्ट्र बैंकका विभिन्न चरणमा छलफल पश्चात मात्रै कुनै पनि विषय मौद्रिक नीतिमा समावेश गर्ने नगर्ने निर्णय हुने प्रबक्ता भट्टले बताए । सोही प्रक्रिया अन्तर्गत राष्ट्र बैंकका विज्ञहरुले बैंकास्योरेन्सबारे छलफल चलाइरहेका छन् ।
उता, पेशागत बीमा अभिकर्ता संघले भने बैंकास्योरेन्स लागू गरे कडा आन्दोलनमा होमिने चेतावनी दिएको छ । देशैभरि रहेका एक लाखभन्दा बढि अभिकर्ताहरुको रोजिरोटी खोस्ने कार्य स्वीकार्य नभएको भन्दै संघले छिट्टै आन्दोलनको घोषणा गर्ने जनाएको छ ।
बैंकमार्फत बीमा गर्र्दा बीमितको आम्दानी प्रमाणिकरणमा समस्या तथा ऋणीलाई जबरजस्ती बीमा गराएको गुनासो पछि केन्द्रीय बैंकले बैंकास्योरेन्स बन्द गरेको थियो । बैंकास्योरेन्स खुलेपछि बैंक आफै बीमा कम्पनीको एजेन्ट भएर बीमा गरी बीमा गरिएको रकमको निश्चित प्रतिशत आम्दानी गर्न सक्ने हुँदा बैंकले बैंकास्योरेन्स खोल्न माग गर्दै आएका छन् ।
