काठमाडौं । कोरोना भाइरसका विरुद्धमा लडिरहेको सरकारले आगामी जेठ ३२ गतेसम्म हाल जारी लकडाउनलाई निरन्तरता निर्णय गरेको छ । शनिबार बसेको मन्त्रिपरिषदको बैठकले जारी लकडाउनलाई थप निरन्तरता दिने निर्णय गरेको हो ।
यसअघि जेठ २१ गतेसम्म मात्रै लकडाउन गरेको थियो । कोरोना भाइरसबाट संक्रमित हुने क्रम बढेपछि सरकार शनिबार नै यस्तो निर्णय गरेको हो । यही जेठ २१ गतेदेखि लकडाउन खुल्छ भन्ने आशामा रहेकाहरु निराश बन्न पुगेका छन् ।
यद्यपि सरकारले लकडाउनको मोडालिटी भने परिवर्तन गर्दै उद्योग व्यवसाय सञ्चालन गर्न दिई थप खुकुलो बनाउन सक्ने जनाएको छ । त्यस्तै, हवाई उडान भने आगामी असार १६ गतेसम्म स्थगित गर्ने निर्णय गरेको छ । केही दिनदेखि कोरोना भाइरस संक्रमितको संख्या ह्वात्तै बढिरहेको छ । शनिबार मात्रै १८९ जनामा कोरोना संक्रमण पुष्टि भई कूल संक्रमितको संख्या १४०१ पुगिसकेको छ ।
यसैबीच, आज बसेको मन्त्रिपरिषद् बैठकले कोरोना भाइरसको संक्रमण फैलिएका ठाउँमा नेपाली सेना परिचालन गर्ने समेत निर्णय गरेको छ । शनिबार नै सुरक्षा परिषदको बैठक बसेको थियो । सो बैठकले कोरोना नियन्त्रणका लागि सेना परिचालन गर्ने निर्णय गरेको थियो ।
यसैबीच, भारतमा एक महिना लकडाउन थप गर्ने निर्णय गरिएकोछ । भारतमा अब असार १६ गतेसम्म लकडाउन हुनेछ ।
