काठमाडौं । लकडाउनका कारण सिंगो देश ठप्प भएपछि सरकारले बीमा अभिकर्ता र सर्भेयरको लाईसेन्स नविकरण गर्ने म्याद असारसम्म थप गर्न निर्देशन दिएकोछ । सरकारको निर्देशनसँगै बीमा समितिले पनि सोही बमोजिमको तयारी सुरु गरिसकेको छ । सम्भवतः आज नभए आईतबार नयाँ निर्देशनमार्फत बीमा अभिकर्ता र सर्भेयरको लाईसेन्सको नविकरण गर्ने म्याद थप हुनेछ । सर्भेयरको लाईसेन्सको म्याद २०७६ चैत्रभित्रमा नविकरण गर्ने व्यवस्था छ ।
अर्थ, सञ्चार तथा सूचना मन्त्री एवम् सरकारका प्रवक्ता डा. युवराज खतिवडाले कोरोना महामारीका कारण सरकारले लागू गरेको लकडाउनको कारण बीमाशुल्क संकलन गर्ने समयावधी थप गरेको जनाएका छन् । त्यस्तै बीमितलाई पनि बीमा शुल्क भुक्तानी गर्ने म्याद थप गर्न भनिएको छ । सोही बमोजिम तयारी भइरहेको बीमा समितिले जनाएको छ ।
जीवन बीमाको प्रिमियम वापतको रकम संकलन गर्ने अवधि जेठ मसान्त सम्म थप गर्ने तयारी भइरहेको छ । सो सम्बन्धमा गत बुधबार गठन गरिएको कार्यदलले समेत तयारी गरिएको जनाएको छ । सरकारले निर्जिवन बीमालाई पनि राहत दिने भएको छ । बीमा अवधि सकिएको बीमालेखको विद्युतिय माध्यमबाट लिखित अनुरोध आएमा नविकरण गर्ने र त्यस्तो बीमा पोलिसीको म्याद लकडाउन सकिएको मितिले १५ दिन सम्म कायम गर्ने व्यवस्था मिलाइने भएको छ ।
