काठमाडौं । नेपाल राष्ट्र बैंकले कोरोनाको महामारीमा बैंक तथा वित्तिय संस्थाबाट प्रवाह हुने सेवा तथा सरकारले घोषणा गरेको राहत कार्यान्वयन गर्न तीन जना कार्यकारी निर्देशकलाई फिल्डमा परिचालन गरेको छ ।
नवनियुक्त गभर्नर महाप्रसाद अधिकारीले बैंकबाट प्रवाह हुने बैंकिङ कारोबार, ब्याज छुट समेत नपाएको अवस्थामा कार्यकारी निर्देशक देव कुमार ढकाललाई परिचालन गरेका छ । त्यस्तै विप्रेषण, टिटी ट्रान्सफर, बैंक ट्रान्सफर तथा एलसी खोल्न समस्या भएमा तत्काल समाधान गर्ने गरी कार्यकारी निर्देशक बम बहादुर मिश्र र एटिएम, मोबाईल बैंकिङ लगायतका सेवा सुविधाका लागि कार्यकारी निर्देशक रेवती प्रसाद नेपाललाई फिल्डमा खटाएको छ । मोबाईल नम्वरसहित खटाइएका उनीहरुलाई सेवा प्रवाहमा समस्या देखिएमा गुनासो सुनेर तत्काल एक्सनमा जाने गरी परिचालन गरिएको जनाइएको छ ।
कोरोना महामारीमा बैंक तथा वित्तिय संस्थाहरुले विशेषतः ब्याज छुट नदिई फट्याई गरेको सन्दर्भमा ढकालले हेर्नेछन् । त्यस्तै विदेशबाट आएको रेमिट्यान्स भुक्तानीमा गडबढ गर्न सक्ने अवस्थालाई मिश्रेले सम्हाल्नेछन् भने अनलाईन बैंकिङ, एटिएमबाट पैसा नआउने लगायतको समस्या सम्बन्धी गुनासो नेपालले सुन्नेछन् ।
केन्द्रीय बैंकले तीन जना कार्यकारी निर्देशकलाई फोकल पर्सन तोकेर समस्या समाधानको लागि समन्वय गर्ने जिम्मेवारी समेत तोकिएको जनाइएको छ ।
राष्ट्र बैंकले तीन कार्यकारी निर्देशकलाई फोकल पर्सनका रुपमा नियुक्त गरी उनीहरुको मोवाइल नम्बर समेत सार्वजानिक गर्दै बैंक तथा वित्तिय संस्थाहरुले गडबढ गरेमा गुनासो गर्न भनिएको छ । राष्ट्र बैंकले वित्तीय संस्थाबाट प्रवाह हुने सेवाको सम्बन्धमा सर्वसाधारणबाट सिधैं गुनासो सुनेर एक्सनमा जान टास्कर्फो गठन गरिएको केन्द्रीय बैंकले जनाएकोे छ ।
