काठमाडौं । विश्वभर महामारीको रुपमा फैलिएको कोरोना पहिलो पटक नेपालभित्र फैलिएको छ । यसअघि विदेशबाट आएका छ जनामा कोरोना देखिएपनि उनीहरुबाट नेपालभित्र कोरोनाको संक्रमण भएको रिपोर्ट आएको थिएन । स्वास्थ्य तथा जनसंख्या मन्त्रालयले थप तीन जना नेपालीलाई कोरोना रोगले छोएको पुष्टि गरेको छ ।
शनिबार जारी सूचना अनुसार पहिलो पटक नेपालभित्र पनि कोरोना सरेको छ । यसअघि कैलालीमा कोरोना संक्रमित भई उपचार गराइरहेका युवाको आफन्त ३४ बर्षिय महिलामा कोरोनाको संक्रमण देखिएको हो । ति महिलालाई यसअघि नै क्वारेन्टाईनमा राखिसकेको छ ।
बाँकी दुई जना भने भारतबाट फर्केका भएको स्वास्थ्य मन्त्रलायले जनाएको छ । मुम्बईबाट फर्किएका कैलालीका एक २१ बर्षिय पुरुषमा कोरोना भेटिएको छ । त्यस्तै भारतको उत्तराखण्डबाट फर्किएका कञ्चनपुरका ४१ बर्षिय पुरुषमा पनि कोरोना रहेको स्वाब परिक्षणबाट पुष्टि भएको स्वास्थ्य तथा जनसंख्या मन्त्रालयले जनाएको छ ।
योसँगै कोरोनाबाट संक्रमित हुनेको संख्या नौ पुगेको छ ।
