काठमाडौं । आज बसेको कोरोना भाइरस रोकथाम तथा नियन्त्रण उच्च स्तरीय समितिको बैठकले जारी लकडाउन कायम राख्दै अत्यावश्यक केही उद्योगहरु भने सशर्त सञ्चालन गर्न दिने निर्णय गरेको छ ।
उपप्रधानमन्त्री तथा समितिका संयोजक ईश्वर पोखरेलको अध्यक्षमा बिहिवार सिंहदरवारमा बसेको बैठकले जारी लकडाउन अवधीभित्रै खाद्यबस्तु र अत्यावश्यक बस्तु उत्पादन गर्ने उद्योग प्रतिष्ठानहरु खोल्न दिने निर्णय गरेको जनाइएको छ । स्रोतका अनुसार सरसफाई, कामदारको सुरक्षाका मापदण्डहरु पूरा गरेर अत्यावश्यक खाद्य पदार्थ उत्पादन गर्ने उद्योगहरु सञ्चालन गर्न दिने निर्णय भएको हो । जस अनुसार दाल चामलका उद्योग, तयारी खाद्य बस्तुहरु चाऊचाउ, बिस्कुट जस्ता उद्योगहरु, चिनि मिलहरु सञ्चालन हुनेछन् ।
त्यस्तै अन्य उद्योगहरु अत्यावश्यक भएमा मजदुरलाई आवासिय सुविधा दिई उत्पादन गर्न सक्ने र त्यसको लागि प्रशासनको अनुमति लिनुपर्ने व्यवस्था पनि आजको बैठकले गरेको छ ।
त्यसैगरी, आजको बैठकले राष्ट्रिय गौरवको आयोजना तामाकोसी, मेलम्ची खानेपानीको काम सम्भव भएसम्म सुरु गर्ने निर्णय समेत गरेको छ । ति आयोजनामा ठूलो संख्यामा कामदार योजना स्थलमै रहेकोले उनीहरुलाई बाहिर आउन नदिई सञ्चालन गर्न दिने निर्णय समेत गरेको छ ।
