काठमाडौं । नेपाल धितोपत्र बोर्डले लकडाउन अवधीभर शेयर कारोबार बन्द गर्ने तयारी गरेको छ । सोही विषयमा नेपाल धितोपत्र बोर्डको बैठक आज बस्दैछ । बोर्डको बैठक सुरु हुनुअघि अनौपचारिक छलफलमा लकडाउन अवधीभर शेयर कारोबार रोक्ने लगभग सहमति भएको बोर्ड स्रोतले जनाएको छ ।
बैठकका लागि अध्यक्ष भिष्मराज ढुंगाना तथा अन्य कार्यकारी निर्देशकहरु कार्यालयमा उपस्थित भइसकेका छन् । आजको बैठकमा भोलिबाट शेयर कारोबार रोक्का राख्ने वा खोल्ने विषयमा निर्णय हुनेछ । बोर्डका कार्यकारी निर्देशक तथा प्रबक्ता निरज गिरीले सरकारको निर्णयपछि मात्रै बोर्डले औपचारिक निर्णय गर्ने बताए । कारोना भाइरस महामारीको समयमा सरकारले गरेको लकडाउनमा शेयर लागानीकर्ताको स्वास्थ्यलाई मध्यनजर गर्दे शेयर कारोबार बन्द गर्न लागिएको हो । नेपाल धितोपत्र बोर्डका कार्यकारी निर्देशक निरज गिरिले भने, ‘लक डाउन अवधिभर गरे शेयर कारोवार बन्द गर्ने विषयमा छलफल भएको छ । लक डाउन खुकुलो भएपछि बजार खोल्दा राम्रो हुने सुझाव आएको छ ।’
गिरीका अनुसार सरकारले निर्णय नगरी बोर्डले निणर्य गर्नेछैन । सरकारले कोरोना भाइरसको महामारी फैलन नदिन गत सोमबारदेखि एक साताको लागि गरेको लकडाउन आज सकिदैछ । सरकारले भोलिबाट पुनः लकडाउन गरे शेयर बजार पनि बन्द गर्ने र सरकारले लकडाउन खोल्ने निर्णय गरे भोलिबाटै बजार खोल्ने तयारीमा धितोपत्र बोर्ड रहेको छ ।
