काठमाडौं । केही दिनदेखि मन्त्रिपरिषद पुनर्गठनको तयारीमा रहेका प्रधानमन्त्री केपी शर्मा ओलीले सम्भवतः आज मन्त्रिपरिषद पुनर्गठन गर्नेछन् । आज विहान बालुवाटारमा सम्पन्न नेपाल कम्युनिष्ट पार्टीको सचिवालय बैठक लगत्तै प्रधानमन्त्री तथा अध्यक्ष केपी शर्मा ओली र अर्का पार्टी अध्यक्ष प्रचण्ड राष्ट्रपति भवन शितलनिवास पुगेका छन् ।
शितल निवासमा राष्ट्रपति विद्यादेवी भण्डारीसँग छलफल गरेर आजै मन्त्रिमण्डल पुनर्गठन गर्ने तयारी छ । कुन कुन मन्त्रीहरु रहने र को को नयाँ बन्ने भन्ने कुरा प्रम ओली र अर्का अध्यक्ष प्रचण्डबीचमा सहमति पश्चात अन्तिम सूचि तयार पारिएको जनाइएको छ । सुरेन्द्र पाण्डे, भिम रावल, जनार्दन शर्मा, प्रभु शाहलगायतका व्यक्तिहरु नयाँ मन्त्री बन्ने चर्चा चलेपनि दुई अध्यक्षले औपचारिक रुपमा कसैको नाम सार्वजनिक गरेका छैनन् ।
उता, राजपा पनि सरकारमा सहभागी हुने निर्णय भएको जनाइएको छ । यद्यपि यसको औपचारिक निर्णय बाहिर आइसकेको छैन । राजपाका अध्यक्ष महन्त ठाकुरलाई सभामुख बनाउने विषयमा सहमति जुटेको बताइएको छ । सभामुख पद रिक्त छ । विपक्षी दलबाट सभामुख बनाउनु पर्ने र हाल नेकपाका उपसभामुखले पद नत्याग्ने बताइँरहँदा राजपाका अध्यक्ष ठाकुरलाई सभामुख बनाउने सहमति जुटेको जनाइएको छ ।
सूत्रका अनुसार आजै साँझसम्म मन्त्रिपरिषद विस्तार गर्ने तयारी गरिएको छ ।
