काठमाडौं । दशैंको मुखमा बुधबार काठमाडौंको सतुंगल र ललितपुरको सुनाकोठीमा भएका दुई छुट्टा छुट्टै सवारी दुर्घटनामा दुई जनाको मृत्यु भएको छ । सार्वजनिक सवारी साधनको ठक्करबाट मृत्यु भएकोले बीमा कम्पनीहरुमा तेस्रो बीमा दावी पर्ने देखिएको छ ।
ललितपुर महानगरपालिका–२७ सुनाकोठीस्थित चापागाउ–लगनखेल सडकमा बा४ख ८२५० नम्बरको बसले ठक्कर दिँदा ७० वर्षीया रुकु कार्कीको मृत्यु भएको छ । उनको मृत्युसँगै बुधबार विहानभरि चापागाऊ हुँदै लगनखेलतर्फ चल्ने अधिकांश सवारी साधनहरु चलेनन् । उक्त दुर्घटनाको बसका चालक फरार रहेकाले खोजी जारी रहेको प्रहरीले जनाएको छ । स्थानीयबासीले दुर्घटनामा बस चालकको गल्ती भएको भन्दै चालकलाई कारवाही नगरेसम्म सडक आवागमन नखोल्ने भन्दै आन्दोलन गरेका थिए ।
यता काठमाडौंको, चन्द्रागिरी नगरपालिका–११ सतुंगलस्थित सडकमा बा३ख ३८१७ नम्बरको टिपरले बा२६प ४९०३ नम्बरको मोटरसाइकललाई ठक्कर दिँदा एक जनाको मृत्यु भएको छ भने एक जना मोटरसाईकल चालक गम्भिर घाइते छन् । टिपरको ठक्करबाट चितवन रत्ननगरका सुनिल अधिकारीको मृत्यु भएको प्रहरीले जनाएको छ ।
दुर्घटनामा घाइते भएका मोटरसाइकल चालक ललितपुर इमाडोलका टीकाबहादुर बानियाँको ओम समाज अस्पताल सतुङ्गलमा उपचार भइरहेको महानगरीय प्रहरी परिसर काठमाडौंले जनाएको छ । उल्लेखित दुर्घटनामा टिपर तथा बसको बीमा गर्ने कम्पनीमा बीमा दावी पर्ने देखिएको छ ।
