काठमाडौं । अर्थमन्त्री डा. युवराज खतिवडाले पनि बैंकर्सको गठनबन्धन शैलीको विरोध गर्दै पटक पटक ऋणको ब्याज बढाएर वर्षमै १०% प्रतिशतसम्म ब्याज बढाउने कार्य स्वीकार्य हुन नसक्ने प्रष्ट पारेका छन् ।
बैंकिङ क्षेत्रको नियमनकारी निकाय राष्ट्र बैंकका गभर्नर डा. चिरञ्जीवी नेपालले बैंकहरुको गलत क्रियाकलापको चर्को विरोध गरेको पर्सीपल्ट शुक्रबार अर्थमन्त्री डा. खतिवडाले पनि बैंकरहरुको आलोचना गरेका हुन् । बैंकहरुले मिलेमतोमा सरकार र राष्ट्र बैंकको नियमनलाई अटेर गर्दै आएका छन् ।
शुक्रबार नेपाल चेम्बर अफ कमर्शले आयोजना गरेको ‘नेपालको अर्थतन्त्रका विद्यामान चुनौती तथा अवसर विषयक कार्यक्रममा अर्थमन्त्री डा.खतिवडाले बैंकहरुले पटक पटक ब्याज बृद्धि गर्ने शैलीका विरुद्धमा कड्किदै चर्को अभिव्यक्ति दिएका हुन् ।
कार्यक्रममा ब्याजदर बृद्धि गरेर बैंकहरुले व्यवसायीहरुलाई धुरुक्कै रुवाएको गुनासो आएपछि कड्किदै अर्थमन्त्री डा. खतिवडाले भने ‘नेपाली परिवेशमा निक्षेपको ब्याजदर भनेको ५–६ प्रतिशत ठिक्क हो । कर्जाको ब्याजदर भने ९ र १० को बीचमा हुनु उपयुक्त हुन्छ ।’ अर्थमन्त्री डा. खतिवडाले ब्याजदर स्थीर हुनुपर्ने धारणा राखेका छन् । कार्यक्रममा निकै कडा रुपमा प्रस्तुत भएका अर्थमन्त्री डा. खतिवडाले राजश्व छली गर्ने जोसुकै व्यवसायीलाई तह लगाउने प्रतिबद्धता व्यक्त गरेका छन् ।
