काठमाडौं । पूर्व सहकर्मी शालिकराम पुडासैनीको आत्महत्यामा दुरुत्साहन गरेको अभियोगमा चितवनस्थित प्रहरी हिराशतमा रहेका न्यूज २४ टिभीका पत्रकार रवि लामिछानेको रिहाईको माग गर्दै शनिबार राजधानीको माइतीघरमा स्वतःस्फूर्त रुपमा विशाल प्रदर्शन गरिएको छ ।
अहिले हजारौं मानिसहरु बबरमहल देखि माईतीघरसम्म भेला भएर पत्रकार लामिछानेको रिहाईको माग गरेका छन् । राष्ट्रिय झण्डा बोकेर उर्लिएको विशाल जनसागरले जनआन्दोलनकै झझल्को दिएको छ ।
कुनै संगठनले घोषित रुपमा नभई स्वतःस्फूर्त रुपमा आयोजना गरिएको प्रदर्शनमा हजारौं मानिसहरु सहभागी छन् । आन्दोलनकारीहरुले गृहमन्त्री रामबहादुर थापा बादलको राजिनामा माग गर्दै नाराबाजी गरिरहेका छन् ।
हिराशतमा रहेका पत्रकार लामिछानेले आफू प्रहरी हिराशतभित्रै असुरक्षित महसुस गरेको भन्ने अभिव्यक्ति बाहिर सार्वजनिक भएलगत्तै नेपाल प्रहरीका आईजीपी सर्वेन्द्र खनाल हिजै चितवन पुगेर हिराशतमा रहेका लामिछानेसँग भेटघाट गरिसकेका छन् । प्रहरीले आजको आन्दोलनलाई शान्तिपूर्ण रुपमा सम्पन्न गर्ने उद्देश्यले आईजीपीले लामिछानेलाई भेटेर सान्त्वन्ना दिन खोजेपनि शनिबार माइतीघरमा हजारौं मानिसहरु भेला भएर विशाल प्रदर्शन गरेका छन् । यो समाचार तयार गर्दासम्म आन्दोलन जारी छ ।
