काठमाडौं । असोज महिनामा आएको बेमाैसमी बाढीका कारण स्थगित भएको बीमा सुपरिवेक्षण सम्बन्धी उच्च स्तरिय अन्तर्राष्ट्रिय सम्मेलन आगामी माघ महिनाको पहिलो साता हुने भएको छ। आतिथ्य संस्था नेपाल बीमा प्राधिकरणका अनुसार माघ ७ देखि ९ गतेसम्म काठमाडाैंमा अन्तर्राष्ट्रिय सम्मेलन आयोजना हुनेछ।
गत असोजको दोश्रो सातामा आयोजना गर्ने तय गरिएको यो कार्यक्रम २५० भन्दा बढी सर्वसाधारणको ज्यान जाने गरी गत असोजमा देशभर आएको भीषण बाढी र पहिरोका कारण स्थगन गरिएको थियो।
प्राधिकरणले इन्टरनेशनल एशोसिएशन अफ इन्स्योरेन्स सुपरभाइजर,एशियन फोरम अफ इन्स्योरेन्स रेगुलेटर, फाइनान्सियल स्टाबिलिटी इन्स्टिच्युट र बिआइएस (बैंक अफ इन्टरनेशनल सेटलमेण्ट) को सहयोगमा यो कार्यक्रम आयोजना गर्न लागेको हो।
१९ औं वार्षिक बैठक र सम्मेलनको विषयवस्तु “भोलिको सुरक्षाः संरक्षण खाडल र जलवायू जोखिमलाई कम गर्ने एकताबद्ध प्रयासहरू” को रूपमा घोषणा गरिएको छ। एसियाली बीमा नियामकहरू,एशियाली विकास बैंक,एक्सेस टु इन्क्लुसिभ इन्स्योरेन्स, जिएआइपि, ओइसिडी लगायत विभिन्न सरोकारवालाहरूले जलवायू परिवर्तन र एसियाली बीमा नियामकले सामना गरेको संरक्षण अन्तर समस्याका कारण हालैका विश्वव्यापी प्रभावबाट उत्पन्न भएका महत्त्वपूर्ण मुद्दाहरूमा केन्द्रित छलफलमा संलग्न हुनेछन्।
सम्मेलन आयोजना मिति अन्यथा हुन गएकोमा सच्याइएकोः सम्पादक
