काठमाडौं । वाणिज्य बैंकहरुको खराब कर्जा (एनपीएल) झनै बढेको छ। बैंकहरुले सार्वजनिक गरेको चालु आर्थिक वर्षको प्रथम त्रैमासको अपरिष्कृत वित्तीय विवरणबाट यस्तो देखिएको हो।
वित्तीय विवरणअनुसार चालु आर्थिक वर्षको प्रथम त्रैमासमा २० वटा वाणिज्य बैंकको औसत खराब कर्जा बढेर ३.५२ प्रतिशत पुगेको छ। अघिल्लो वर्ष सोही अवधिमा वाणिज्य बैंकहरुको औसत खराब कर्जा ३.०६ प्रतिशत थियो।
समीक्षा अवधिमा वाणिज्य बैंकहरुमध्ये ४ वटाको मात्रै खराब कर्जा अघिल्लो वर्षको तुलनामा घटेको छ। नबिल बैंक, एभरेष्ट बैंक, नेपाल एसबीआई बैंक र कृषि विकास बैंकको खराब कर्जा घटेको हो। बाँकी १६ वटा वाणिज्यको खराब कर्जा बढेको छ।
वित्तीय विवरणअनुसार दुईवटा वाणिज्य बैंकको खराब कर्जा ५ प्रतिशत नाघेको छ। सिटिजन्स बैंक र लक्ष्मी सनराइज बैंकको खराब कर्जा ५ प्रतिशत माथि रहेको हो।
सबैभन्दा कम खराब कर्जा एभरेष्ट बैंकको देखिएको छ। यो बैंकको खराब कर्जा ०.७७ प्रतिशतमात्रै रहेको छ। अघिल्लो वर्ष एभरेष्ट बैंकको खराब कर्जा ०.९० प्रतिशत थियो।
