काठमाडौं । सामलिङ्ग पावर कम्पनी पौने ४३ लाख बढी कित्ता शेयरको लकइन अवधि सकिन लागेको छ।
कम्पनीले आज एक सूचना जारी गर्दै संस्थापक, आयोजना प्रभावित स्थानीय र कर्मचारीको गरी कुल ४२ लाख ८४ हजार ६०० कित्ता शेयरको लकइन अवधि आउँदो कात्तिक १५ गतेबाट सकिने जानकारी गराएको हो। जसमा संस्थापकको ३७ लाख ७० हजार कित्ता, आयोजना प्रभावित स्थानीयको ५ लाख कित्ता र कर्मचारीको १४ हजार ६०० कित्ता रहेको छ।
यो कम्पनीले २०७८ कात्तिक ४ गतेदेखि कात्तिक ८ गतेसम्म आइपीओ बिक्री खुला गरेको थियो। आइपीओ बाँडफाँट भने कात्तिक १६ गते गरिएको थियो। सोही बाँडफाँटको मितिबाट संस्थापक, स्थानीय र कर्मचारीको शेयर ३ वर्षसम्म लकइनमा राख्नुपर्ने प्रावधान रहेको छ।
कम्पनीका संस्थापक शेयरधनीमध्ये सञ्चालक सदस्य कायम रहेका व्यक्ति तथा कम्पनीको उच्च तहमा रही कार्यरत कर्मचारीले भने आफ्नो नाममा रहेको शेयर खरिदबिक्री गर्न पाउने छैनन्।
