काठमाडौं । अमेरिकाको न्युयोर्कमा प्रधानमन्त्री केपी शर्मा ओलीको सहभागिता हुने भनिएको बृहत अन्तर्क्रिया कार्यक्रम स्थगित भएको छ।
नेपाली महावाणिज्य दूतावास न्युयोर्क र अमेरिकामा रहेका नेपाली समुदायको संयुक्त आयोजनामा आज प्रधानमन्त्री ओलीको स्वागत तथा अन्तर्क्रिया कार्यक्रम गर्ने तयारी थियो। कार्यक्रममा परराष्ट्रमन्त्री आरजु राणा देउवा पनि सहभागी हुने भनिएको थियो। दुवैजनाको तस्बिर राखेर कार्यक्रमको प्रचारप्रसार पनि गरिएको थियो।
अन्तिम समयमा नेपाली महावाणिज्य दूतावास न्यूयोर्कले आज एक सूचना जारी गरी कार्यक्रम स्थगित भएको जानकारी गराएको छ। प्रधानमन्त्री ओली र परराष्ट्रमन्त्री देउवाको संयुक्त राष्ट्रसंघको महासभा, समिट अफ द फ्युचर तथा अन्य साइडलाइन मिटिङहरुमा व्यस्त रहनुपरेको र समारोहस्थलको सुरक्षा संवेदनशीलताबारे सम्बन्धित निकायको सुझाव समेतलाई ध्यानमा राखी आज आयोजना हुने बृहत कार्यक्रम स्थगन गरिएको सूचनामा उल्लेख छ।
यसबाट पर्न गएको असुविधाप्रति आयोजकका तर्फबाट महावाणिज्य दूतावासले दुःखसमेत व्यक्त गरेको छ।
