काठमाडौं । एसियाली बीमा बजारहरुमा अमेरिकाको तुलनामा प्रतिव्यक्ति खर्च उल्लेखनीय रुपमा कम हुने गरेको पाइएको छ। यो अन्तर आगामी वर्षहरुमा अझै फराकिलो हुने अपेक्षा गरिएको छ।
अल्इन्डेक्स डटकमको तथ्यांकअनुसार सन् २०२८ सम्म अमेरिकीहरुले बीमामा वार्षिक औसत १५ हजार डलर खर्च गर्नेछन्। जुन औसत एसियालीको भन्दा लगभग ३० गुणा बढी हुनेछ।
खर्चमा असमानता मुख्यतया अमेरिकी बीमा बजारको नवीनतम संरचनाका कारण हो। जहाँ निजी स्वास्थ्य बीमाले कुल प्रतिव्यक्ति लागत बढाउन प्रमुख भूमिका खेल्छ।
यसको विपरीत धेरै एसियाली देशमा प्रायः अपर्याप्त सरकारी संलग्नता वा निजी बीमामा कम निर्भरता रहेका विभिन्न स्वास्थ्य सेवा र बीमा संरचना छन्। जसका कारण बीमा प्रतिव्यक्ति खर्च धेरै तल्लो तहमा रहेको छ।
चीन र जापानजस्ता प्रमुख बीमा बजारहरुले विश्वव्यापी प्रिमियममा महत्त्वपूर्ण योगदान पुर्याए पनि तिनीहरुको प्रतिव्यक्ति खर्च अमेरिकाको तुलनामा न्यून रहेको छ। उच्चस्तरको सम्पत्ति र बीमामा निर्भर स्वास्थ्य सेवा प्रणालीद्वारा सञ्चालित अमेरिकी बजार निरन्तर बढ्दै जाँदा अमेरिका र एसियाली बीमा खर्चबीचको खाडल अझै फराकिलो हुने अनुमान गरिएको छ।
सन् २०२८ सम्ममा एसियामा प्रतिव्यक्ति बीमा खर्च अमेरिकाको भन्दा धेरै कम रहनेछ। जसले यो क्षेत्रको वित्तीय परिदृश्यमा बीमा कसरी एकीकृत हुन्छ भन्ने कुरामा स्पष्ट भिन्नताहरु झल्काउँछ। –एजेन्सी
