काठमाडौं । नेपालीले विदेशमा शिक्षा र भ्रमणका लागि चालु आर्थिक वर्षको ७ महिना माघसम्म १ खर्ब रुपैयाँ बढी खर्च गरेका छन्।
नेपाल राष्ट्र बैंकले सार्वजनिक गरेको तथ्यांकअनुसार साउनदेखि माघ मसान्तसम्म नेपालीले विदेशमा शिक्षा र भ्रमणका लागि १ खर्ब ४ अर्ब ७५ करोड रुपैयाँ खर्च गरेका हुन्। त्यसमध्ये शिक्षातर्फ ६६ अर्ब ६४ करोड रुपैयाँ खर्च भएको तथ्यांकले देखाएको छ।
राष्ट्र बैंकको तथ्यांकअनुसार गत आर्थिक वर्षको सोही अवधिको तुलनामा समीक्षा अवधिमा सेवा खातातर्फको व्यय ४९.९ प्रतिशतले बढेको छ। अघिल्लो वर्ष सोही अवधिमा भ्रमण व्यय ६९ अर्ब ८९ करोड रुपैयाँ विदेशिएको थियो। त्यतिबेला उक्त रकममध्ये शिक्षातर्फ ४३ अर्ब रुपैयाँमात्र विदेशिएको थियो।
