काठमाडौं । नेपाल बीमा प्राधिकरणले जीवन बीमा अभिकर्ताको पाँचौं चरणको परीक्षाको मिति सार्वजनिक गरेको छ । प्राधिकरणले यही मंसिर २९ गतेबाट पाँचौं चरणको परीक्षा संचालन गर्न लागेको हो । प्राधिरकणले गत कार्तिकदेखि अभिकर्ता इजाजतपत्र वितरण गर्नका लागि अनलाइन माध्यमबाट परीक्षा संचालन गर्न शुरु गरेको थियो । प्राधिरकणले मंसिर तथा पुस महिनामा हुने अनलाइन परीक्षाको मिति सार्वजनिक गरेको हो ।
प्राधिकरणले पाँचौं चरणको परीक्षा मंसिर २९ गते शुक्रबार दिउँसो १ः३० बजेबाट ३ बजेसम्म र ३ः३० बजेबाट साझ ५ बजेसम्म संचालन गर्ने भएको छ । मंसिर ३० गते विहान ११ बजेदेखि १२ः३० बजेसम्म, दिउँसो १ बजेदेखि २ः३० बजेसम्म र दिउँसो ३ बजेदेखि ४ः३० बजेसम्म संचालन गर्ने जनाएको छ । त्यस्तै, पुस १ गते आइतबारबाट पुस ७ गते शनिबारसम्म तालिम संचालन गर्ने जनाएको छ । उक्त तालिम विहान ८ः३० बजेदेखि १० बजेसम्म संचालन गर्ने समेत जनाएको छ ।
प्राधिकरणले कात्तिकको तेस्रो सातादेखि सुरु गरेको परीक्षामा उत्तीर्णहरुलाई अनलाइन माध्यमबाटै प्रमाणपत्र वितरण गरेको हो । चौथो चरणमा गत मंसिर १३ गतेदेखि मंसिर १५ गतेसम्म सञ्चालन अनलाइन परीक्षाबाट २१५ जना अभिकर्ता इजाजतपत्र परीक्षा उत्तीर्ण गरेका हुन्।
त्यसैगरी, पहिलो चरणमा २१९ जना, दोस्रो चरणमा १७६ जना र तेस्रो चरणमा ११६ जनाले अनलाइन माध्यमबाट परीक्षा उत्तीर्ण गरी अभिकर्ता इजाजतपत्र परीक्षा उत्तीर्ण गरेका थिए।
प्राधिकरणले वितरण गरेको प्रमाणपत्रमा बीमा ऐन २०७९ को दफा ९२ उपदफा २ को व्यवस्था बमोजिम बीमा मध्यस्थकर्ता (अभिकर्ता)को इजाजतपत्रका लागि प्राधिकरणद्वारा सञ्चालित जीवन बीमा अभिकर्ताको अनलाइन परीक्षामा सहभागी भई उत्तीर्णांक प्राप्त गरेमा प्रमाणपत्र प्रदान गर्दै जाने प्राधिकरणले जनाएको छ।
