काठमाडौं । नेपाल धितोपत्र बोर्ड (सेबोन)ले गत कात्तिकदेखि प्राथमिक शेयर (आइपीओ) अनुमति दिएको छैन। हकप्रद शेयर जारी गर्ने अनुमति पनि असोज मध्यतिरबाट धितोपत्र बोर्डले रोकेको छ।
घटेको बजारमा धमाधम आइपीओ र हकप्रद निष्कासनको अनुमति दिएर धितोपत्र बोर्डले बजारलाई झनै प्यानिक बनाएको भन्दै लगानीकर्ताले विरोध र आलोचना भएको छ। लगानीकर्ताहरुले हाललाई आइपीओ र हकप्रद अनुमति रोक्न धितोपत्र बोर्डसँग माग गरेका थिए। धितोपत्र बोर्डले लगानीकर्ताको मागलाई सम्बोधन गर्दै हाललाई आइपीओ र हकप्रद निष्कासनको अनुमति रोकेको छ।
अहिले धितोपत्र बोर्डको पाइपलाइनमा २४ वटा कम्पनीको आइपीओ रहेका छन्। आइपीओको अनुमति पर्खेर बसेका कम्पनीहरुमा १२ वटा जलविद्युत समूहका छन्। त्यस्तै ६ वटा अन्य समूहका, ४ वटा उत्पादन तथा प्रशोधन समूहका र २ वटा होटल तथा पर्यटन समूहका छन्।
यी कम्पनीले कुल १० करोड ५४ लाख ५ हजार ३२१ कित्ता आइपीओ ल्याउने तयारी गरेको छ। यी कम्पनीले आइपीओ बिक्रीबाट १५ अर्ब ४१ करोड ६७ लाख ८ हजार १०० रुपैयाँ संकलन गर्नेछन्।
