काठमाडौं । नेपाल बीमा प्राधिकरण मधेश प्रदेश कार्यालयले आर्थिक वर्ष २०८०/ ८१ को वार्षिक कार्यक्रम अनुसार स्थानीय सरकारसँग नेपाल बीमा प्राधिकरण विषयक अन्तरक्रिया तथा छलफल कार्यक्रम सम्पन्न गरेको छ । उक्त कार्यक्रम कार्तिक २२ गते रौतहट जिल्लाको माधव नारायण नगरपालिकासँग, नगरपालिकाको सभा हलमा सम्पन्न गरिएको हो ।
उक्त कार्यक्रमको सभापतित्व नेपाल बीमा प्राधिकरण मधेश प्रदेश कार्यालय प्रमुख कुसुम शर्माले गरेकी थिइन् । कार्यक्रममा प्रमुख अतिथिको रुपमा माधव नारायण नगरपालिकाका नगर प्रमुख बैजनाथ प्रसाद यादव, विशेष अतिथीको रुपमा नगर उपप्रमुख निर्मला देवी रमण, अतिथिको रुपमा नगरपालिकाका प्रमुख प्रशासकिय अधिकृत देवनाथ यादव रहेका थिए ।
उक्त कार्यक्रमको सञ्चालन नेपाल बीमा प्राधिकरणका सहायक निर्देशक अनिश तिमिल्सिनाले गरेका थिए । कार्यक्रममा स्वागत मन्तव्य प्राधिकरणका सागर आचार्यले राखेका थिए । उक्त कार्यक्रममा विभिन्न वडा वडाध्यक्षहरु, कार्यपालिकाका सदस्यहरु, नगरपालिकाका कर्मचारीहरु, अगुवा कृषकहरु, बैंक तथा वित्तिय संस्थाका प्रतिनिधीहरु र बीमकका शाखा कार्यालयका प्रतिनिधीहरु तथा महिला समुहका व्यक्तिहरु गरी करिब ८० जनाको सहभागिता रहेको थियो।
उक्त कार्यक्रममा प्रदेश कार्यालय प्रमुख कुसुम शर्माले बीमा र बीमा प्राधिकरणको बारेमा प्रस्तुतिकरण दिएकी थिइन् । प्रस्तुतिकरण पश्वातको छलफल कार्यक्रममा सहभागीहरुले कृषि तथा विभिन्न बालीहरुको बीमाका बारेमा र दावी भुक्तानी प्रक्रियामा जिज्ञासा राखेका थिए ।
छलफलका क्रममा अभिकर्ता र बीमकहरुले बीमितलाई दिनु पर्ने सेवा गुणस्तरीय नरहेको गुनासो व्यक्त गरे । कृषकहरुले चोरीको अवस्थामा दावी भुक्तानी नपाउने व्यवस्थामा आपत्ति जनाउदै सो सम्बन्धमा आवश्यक संशोधन गर्न सुझाव दिएका थिए । केहि सहभागीहरुले बीमा गर्दा सहजै गर्ने तर दावी भुक्तानीको समयमा सानो सानो समस्या देखाइ दावी भुक्तानी रोकेको गुनासो राखेका थिए । साथै, केहि सहभागिहरुका अनुसार कर्मचारी र अभिकर्ताहरुलाई पर्याप्त तालिम र अब्बल बनाए मात्रै गुणस्तरीय सेवा प्रवाह हुने धारणा राखेका थिए।
कार्यक्रममा जीवन बीमक र निर्जीवन बीमकका प्रतिनिधिहरुले स्थानीय भाषामा समेत बीमा सम्बन्धी जानकारी दिएका थिए । कार्यक्रमका अतिथि माधव नारायण नगरपालिकाका प्रमुख प्रशासकिय अधिकृतले बीमकहरु बीमालेख बिक्रिमा मात्रै केन्द्रित नभई दावी भुक्तानीलाई प्राथमिकतामा राख्न सुझाव दिएका थिए ।
साथै, पालिका कृषि बीमा गर्न इच्छुक रहेको हुँदा बीमकहरुलाई कृषि तथा पशुपन्छी बीमा सम्बन्धी नगरपालिकासंग समन्वय गर्न गरे । नेपाल बीमा प्राधिकरणले गरेको कार्यक्रम उदाहरणिय रहेको र अब यो अभियान प्राधिकरण, बीमक र पालिकाको साझेदारीमा गाउँ गाउँ र टोल टोल सम्म पुर्याई नागरिकहरुलाई सचेत र सुरक्षित गर्न अनुरोध गरेका थिए ।
कार्यक्रमका प्रमुख अतिथि माधव नारायण नगरपालिकाका नगर प्रमुखले बीमा वास्तवमै आवश्यक रहेको र सबैले आफ्नो जीवनको र आफ्ना सम्पत्तीहरुको बीमा गर्नु पर्ने कुरामा जोड दिदै बीमा समर्पणका लागि ३ वर्षे प्रावधानले बीमितहरु मर्कामा परेको हुँदा सो बारे आवश्यक संसोधन गर्न सुझाव दिएका थिए ।
साथै, वडाध्यक्षहरुलाई आफ्नो वडाहरुमा बीमा साक्षरता अभिवृद्धि गर्न कार्यक्रमबाटै निर्देशन दिनुका साथै, नगरपालिकाले विपन्न वर्गहरुलाई लक्षित गरी बीमा कार्यक्रम अगाडि बढाउने प्रतिबद्धता जाहेर गरे ।
आर्थिक सहायताको थोरै रकम पनि बीमामा परिचालन गरेमा हजारौँ परिवारहरुको जीवन, सम्पत्ति र बालि नालिको जोखिम हस्तान्तरण हुने हुँदा आगामी बजेटमा बीमाको लागि रकम छुट्याउने र हालको लागि केहि रकम रकमान्तर गरी बीमाका कार्यक्रमहरु अगाडि बढाउने प्रतिबद्धता समेत जाहेर गरेका थिए ।
कार्यक्रम आयोजना गरी बीमा बारे स्थानीय स्तरमा जनचेतना अभिवृद्धि गर्न योगदान गरेकोमा नेपाल बीमा प्राधिकरण मधेश प्रदेश कार्यालयलाई धन्यवाद ज्ञापन गरे ।
कार्यक्रमको समापनमा प्राधिकरणको मधेश प्रदेश कार्यालय प्रमुख कुसुम शर्माले सहभागीहरुबाट प्राप्त भएको सुझावहरु प्राधिकरणले आगामी दिनहरुमा सम्बोधन गर्दै जाने र नगरपालिकालाई बीमा सम्बन्धी आवश्यक पर्ने सल्लाह, सुझाव र परामर्शका लागि बीमा प्राधिकरण तत्पर रहेको धारणा राखिन् ।
साथै बीमा गराउदै गर्दा सेवा शर्तहरु बुझि बीमा गर्न र बीमाशुल्क तिरे पश्चात अनिवार्य रुपमा रसिद लिन अनुरोध गर्दै बीमा कम्पनीका प्रतिनिधीहरुलाई समय समयमा पालिकामा आई आवश्यक समन्वय गर्नका लागि अनुरोध गरेकी थिइन् ।
