काठमाडौं । भर्खरै मर्जर प्रक्रिया सम्पन्न गरेको प्रभु महालक्ष्मी लाइफ इन्स्योरेन्स कम्पनीले गत आर्थिक वर्ष (२०७९/८०) को चौथो त्रैमासिक वित्तीय विवरण सार्वजनिक गरेको छ । कम्पनीले सार्वजनिक गरेको अपरिष्कृत वित्तीय विवरण अनुसार कम्पनीको खुद नाफा ४४ दशमलव ६७ प्रतिशतले वृद्धि भएको छ । गत आर्थिक वर्षको असार मसान्तसम्म कम्पनीले १० करोड ५० लाख रुपैयाँ खुद मुनाफा आर्जन गरेकोमा अघिल्लो आर्थिक वर्षको सोही अवधिमा कम्पनीले ७ करोड २६ लाख रुपैयाँ खुद नाफा गरेको थियो । एक्चुरी भ्यलुएशन पछि बीमा कम्पनीको वास्तविक नाफा आउने छ।
कम्पनीको जीवन बीमा कोष १३८ दशमलव ५८ प्रतिशतले बढेको छ । जीवन बीमा कोषमा ७ अर्ब २४ करोड रुपैयाँ जम्मा भएको छ । अघिल्लो वर्षको यहि अवधिमा जीवन बीमा कोषमा ३ अर्ब ३ करोड रुपैयाँ थियो । त्यस्तै जगेडा कोष ७३ दशमलव ९५ प्रतिशतले वृद्धि हुँदै ७४ करोड ७३ लाख पुगेको छ ।
समिक्षा अवधिमा खुद बीमा शुल्क आर्जन १६ दशमलव ९१ प्रतिशतले घटेको छ । असार मसान्तसम्ममा खुद बीमा शुल्क आर्जन १ अर्ब ९० करोड रुपैयाँ रहेको छ । अघिल्लो आर्थिक वर्षको यहि अवधिसम्म खुद बीमा शुल्क आर्जन २ अर्ब २९ करोड थियो ।
कम्पनीले गत आर्थिक वर्ष ८३ करोड १० लाख रुपैयाँको खुद दाबी भुक्तानी गरेको छ । अघिल्लो आर्थिक वर्षको सोही अवधिमा ४३ करोड ४१ लाखको दाबी भुक्तानी भएको थियो ।
प्रभु महालक्ष्मी लाइफ इन्स्योरेन्सको चुक्ता पूँजी ४ अर्ब २९ करोड पुगेको छ । प्रकाशित विवरण अनुसार कम्पनीको प्रतिशेयर आम्दानी २ रुपैयाँ ४५ पैसा रहेको छ भने प्रतिशेयर नेटवर्थ ११९ रुपैयाँ ०७ पैसा रहेको छ ।
