काठमाडौं । सागर डिस्टिलरी लिमिटेडले आइपीओ विक्री गर्ने भएको छ । जसका लागि कम्पनीले आइपीओ बिक्री प्रबन्धकमा मुक्तिनाथ क्यापिटललाई नियुक्त गरेको छ। सो सम्बन्धी आज सम्झौता भएको छ । सम्झौतापत्रमा सागर डिस्टिलरीका तर्फबाट अध्यक्ष सन्दीप जलान र मुक्तिनाथ क्यापिटलका तर्फबाट प्रमुख कार्यकारी अधिकृत कविन्द्रध्वज जोशीले हस्ताक्षर गरेका छन्।
सागर डिस्टिलरीले कम्पनीको जारी पुँजीको १५ प्रतिशतले हुने ७ लाख ५० हजार कित्ता आईपीओ सर्वसाधारणलाई बिक्री गर्न लागेको हो। सर्वसाधारण जनताको सहभागिता बढाउनका लागि १५ प्रतिशत आइपीओ निकाल्ने निर्णय गरेको कम्पनीले जनाएको छ । कम्पनीले अंकित मूल्य १०० रुपैयाँको दरले आइपीओ निष्काशन गर्ने जनाएको छ ।
नेपालमा गुणस्तरीय मदिरा उत्पादन र बिक्रीवितरण गर्न विसं २०६९ सालमा सागर डिस्टिलरीको स्थापना भएको हो। कम्पनीको फ्याक्ट्री नवलपुरको देवचुलीमा रहेको छ। उपभोक्ताको स्वाद र स्वास्थ्यलाई उच्च महत्व दिँदै मदिराजन्य उत्पादनहरु तयार पार्ने गरिएको कम्पनीले जनाएको छ।
