काठमाडौं । आन्तरिक राजस्व विभागले ‘वैदेशिक पर्यटन शुल्कसम्बन्धी कार्यविधि,२०८०’ जारी गरेको छ । उक्त कार्यविधि अनुसार विदेश भ्रमणमा जाँदा पाँच प्रतिशतसम्म शुल्क तिर्नुपर्ने हुन्छ ।
आर्थिक ऐन,२०८० को दफा २२ मा विदेशमा पर्यटन भ्रमणका लागि जाने नेपाली पर्यटकले गर्ने भुक्तानी रकममा पाँच प्रतिशतका दरले वैदेशिक पर्यटन शुल्क लाग्ने उल्लेख गरिएको छ । सो व्यवस्थालाई कार्यान्वयनमा ल्याउन विभागले वैदेशिक पर्यटन शुल्कसम्बन्धी कार्यविधि,२०८० जारी गरेको हो ।
कार्यविधि अनुसार,वैदेशिक भ्रमणको प्याकेज बिक्रेताले प्याकेज बिक्रीका बखत विदेशमा पर्यटन भ्रमणका लागि जाने नेपाली पर्यटकले गर्ने भुक्तानी रकममा पाँच प्रतिशतका दरले शुल्क लगानी असुल गर्नुपर्ने उल्लेख छ । साथै फर्म वा कम्पनीले व्यवसाय प्रवर्द्धनका सिलसिलामा आफूसम्बद्ध प्राकृतिक व्यक्तिलाई वैदेशिक भ्रमणमा लैजाँदा लाग्ने खर्च रकममा लेखाङ्कनका बखत पाँच प्रतिशतका दरले शुल्क असुल गर्नुपर्नेछ।
