काठमाडौं । व्याज र किस्ताको ह्याङ् ओभर पछि शेयर बजार बढ्ने संकेत देखिएको छ । आर्थिक वर्षको अन्तिम साताको पहिलो कारोबार दिनमै नेप्से सूचक २५ अंकले बढ्दा तीन अर्ब माथिको कारोबार भएको छ । बजारको गिरावट यहि सातामा मात्रै रहने चर्चा गरिए पनि साताको सुरुमै बजारमा सुधार भएको हो ।
बैंकिङ प्रणालीमा अधिक तरलता थुप्रिने क्रम बढिरहेको छ । यहि हिसावले तरलता बढ्दै जाने हो भने साउन भदौ पछि कर्जाको व्याजदर ८/९ प्रतिशतमा झर्नेछ । अहिले नै बैंकहरु कर्जा प्रवाह नहुँदा निक्षेपको खर्च बढेको भन्दै रोइलो गर्न थालिसके ।
यहि हिसावले तरलता बढ्दै जाने हो भने बैंकहरुले शेयरधितो कर्जामा लगानी बढाउने निश्चित छ । शेयर बजार जहिले पनि बैंकिङ तरलता सहज हुँदा बढ्ने गर्छ । अर्को तर्फ बजार अझै पनि तल्लो विन्दुमा रहेकाले शेयरधितो कर्जा लिएर पनि बजारमा राम्रो पैसा कमाउने अवसर बाँकी छ । यहि कारणले यस आर्थिक वर्षको अन्तिम महिनाको अन्तिम साताको पहिलो कारोबारकै दिन सुधार भयो ।
आज आइतबार नेप्से सूचक २८.३८ अंकले सुधार भएर २०७७.७६ अंकमा रोकिएको छ । कारोबार रकम पनि तीन अर्ब ४ करोड रहेको छ । १६८ वटा कम्पनीको शेयर मूल्यमा सुधार हुँदा ५० वटा कम्पनीको शेयर मूल्य घटेको छ ।
आज पनि होटल समुहमा उछाल आएको छ । होटलको सूचक ४.६३ प्रतिशतले सुधार हुँदा व्यापार र बीमा कम्पनीहरुले सर्वाधिक धेरै साथ दिएका छन् । बैंकिङ सूचक भने ८.१४ अंकले मात्रै सुधार भएको छ । आज कारोबारको सुरुवाति अवस्थादेखि नै बढ्न सुरु भएको छ । आज सबैभन्दा धेरै बैंकिङ प्रणालीमा अधिक तरलता थुप्रिएको समाचारले लगानीकर्ता हौसिएका छन् ।
