सूर्यविनायक नगरपालिकाले धान दिवसका अवसरमा तीनदिने ‘सूर्यविनायक घरेलु, कृषि तथा पर्यटन मेला–२०८०’ आयोजना गर्ने भएको छ ।
नगरपालिकाले आज मेलास्थल जगातिस्थित तरकारी बजारमा आयोजना गरेको पत्रकार सम्मेलनमा नगरपालिकाका प्रमुख वासुदेव थापाले कृषि र पर्यटनको विकास गर्ने लक्ष्यका साथ मेला आयोजना गर्न लागिएको जानकारी दिए । उनले धान दिवसका अवसरमा असार १५ गते बिहान १०ः०० बजे मेलाको उद्घाटन गरिने जानकारी दिए । मेला १७ गते साँझसम्म सञ्चालन हुनेछ ।
‘दिगो विकास व्यवस्थित सहरः स्वच्छ समृद्ध सूर्यविनायक नगर’ भन्ने नगरपालिकाको नारालाई सार्थक बनाउँदै दीर्घकालीनरूपमा कृषि, घरेलु उद्योग र पर्यटनलाई मुख्य आर्थिक मेरुदण्ड बनाउने उद्देश्यले मेलाको आयोजना गर्न लागिएको प्रमुख थापाले बताए ।
‘सूर्यविनायकले पहिलोपटक यस्तो मेला आयोजना गर्दैछ । नगरपालिकाको समग्र आर्थिक विकासको रूपमा रहेका घरेलु तथा साना उद्योग, कृषि र पर्यटन क्षेत्रको प्रवद्र्धन गर्दै कृषिलाई पर्यटनसँग जोडेर यहाँका उत्पादनलाई सिधै बजार र उपभोक्तासँग जोडने उद्देश्यले मेलाको आयोजना गर्न लागेका हौँ ।’
पत्रकार सम्मेलनमा नगरपालिकाकी उपप्रमुख सरिता भट्टराईले कृषि र पर्यटन क्षेत्रमार्फत सूर्यविनायक नगर क्षेत्रको आर्थिक, सामाजिक तथा सांस्कृतिक विकासका साथै दिगो विकासको लक्ष्य हासिल गर्न मेलाले टेवा पुर्याउने विश्वास व्यक्त गरिन् । मेलाबाट स्थानीय उद्योगी तथा व्यवसायीको सञ्जाल विस्तार हुने बताउँदै स्थानीय मौलिक उत्पादन तथा वस्तुको स्थानीय, प्रादेशिक तथा राष्ट्रिय हुँदै अन्तर्राट्रियस्तरसम्म पुहुँच अभिवृद्धि गर्दै कृषिलाई पर्यटन उद्योगसँग जोडेर लैजाने उनले बताइन् ।
