काठमाडौं । नेपाल राष्ट्र बैंकले खुकुलो मौद्रिक नीति ल्याउने चर्चा सँगै आज दोस्रो बजारमा बैंक वित्तीय संस्थाको शेयर मूल्यमा उछाल आएको छ । धेरै लामो समयदेखि तल्लो विन्दुमा रहेका अधिकाम्स माइक्रोफाइनान्सको शेयर मूल्यमा सकारात्मक सर्किट लागेको छ ।
लगानीकर्ताले बीमा कम्पनी तथा होटल समुहका शेयर बिक्री गरेर लघुवित्त वित्तीय संस्थाको शेयर खरिद गरेका छन् । छिटो कमाउने होडबाजीमा लगानीकर्ताको ध्यान अव लघुवित्त वित्तीय संस्थाको शेयरमा मोडिएको छ । गएका दिनमा होटलको सूचकमा व्यापक सुधार भयो ।
सबैभन्दा तल्लो विन्दुमा रहेका बाणिज्य बैंकका शेयरधनीहरुले आज केहि राहात पाएका छन् । बाणिज्य बैंकको सूचक पनि ४८.२५ अंकले सुधार भएको छ । नेप्से सूचक ५६.९४ अंकले सुधार हुँदा ५ अर्ब ४७ करोडको खरिद बिक्री भएको छ । १८७ वटा कम्पनीको शेयर मूल्यमा सुधार हुँदा ३४ वटा कम्पनीको शेयर मूल्य घटेको छ ।
उत्पादन तथा प्रशोधन, व्यापार र निर्जीवन बीमाको सूचक बाहेक सबैमा सुधार देखिएको छ । सर्वाधिक धेरै लघुवित्त वित्तीय संस्थाहरुको सूचक ८.९६ प्रतिशतले बढेको छ । आज ३४ वटा कम्पनीको शेयर मूल्यमा सर्वाधिक सुधार हुँदा सर्किट लागेको छ । स्वावलम्बन लघुवित्तको मात्रै २५ करोड १२ लाखको खरिद बिक्री भएको छ । नेपाल राष्ट्र बैंकले मौद्रिक नीति मार्फत मर्जरका लागि जोड दिदै आएकोमा अवदेखि हकप्रदलाई पनि प्राथमिकता दिने हल्लाले पनि आज बैंक वित्तीय संस्थाको शेयर मूल्यमा सुधार भएको हो ।
