काठमाडौं । दोभान हाइड्रोपावर लिमिटेडले आइपीअो निष्काशन गर्ने भएको छ । कम्पनीले जारी पूँजी ७६ करोडको ३० प्रतिशतले हुन आउने रकम बराबरको आइपीओ विक्री गर्ने भएको हो । कम्पनीले १०० अंकित दरका कुल २२ लाख ८० हजार कित्ता आइपीओ निष्काशन गर्नेछ ।
उक्त आइपीओ आयोजना प्रभावित क्षेत्रका स्थानीय बासिन्दा, नेपाल सरकारको सम्बन्धित निकायबाट श्रम स्वीकृति प्राप्त गरी वैदेशिक रोजगारी गरिरहेका नेपाली, सर्वसाधारण तथा कम्पनीमा कार्यरत कामदार र कर्मचारीलाई जारी गर्ने कम्पनीले जनाएको छ ।
आइपीओ निष्काशन गर्नका लागि कम्पनीले सानिमा क्यापिटल लिमिटेडलाई आइपीओ निष्काशन तथा विक्री प्रबन्धकका रूपमा नियुक्त गरेको छ । यससम्बन्धी सम्झौतापत्रमा क्यापिटलका तर्फबाट प्रमुख कार्यकारी अधिकृत भीष्मराज चालिसे र हाइड्रोपावरका तर्फबाट प्रबन्ध सञ्चालक पुरन्जन राईले हस्ताक्षर गरेका छन् ।
कम्पनीले सोलुखुम्बुमा ५.२ मेगावाट क्षमताको जुनवेशी जलविद्युत आयोजना निर्माण गरिरहेको छ । सोही आयोजनामा आइपीओबाट प्राप्त रकम लगानी गरिने कम्पनीले जनाएको छ ।
