काठमाडौं । बुधबार नेप्से सूचक झिनो अंकले सुधार भएर बन्द भएको छ । कारोबार खुल्ने वित्तीकै सुधार हुन थालेको नेप्से सूचक एक बजे पछि घट्न थालेको थियो । यसै क्रममा ४.६८ अंकले सुधार भएर १९३२.३३ अंकमा रोकिएको छ ।
सरकारले आर्थिक विधेयकमा रहेको पूँजीगत लाभकर सम्बन्धी व्यवस्थालाई तत्काल नहटाउने संकेत सँगै शेयर बजारमा पुन गिरावट हुने संकेत देखिएको छ । लगानीकर्ताको चर्को आन्दोलन पछि अर्थमन्त्रालय तथा आन्तरिक राजश्व विभागले यसमा कुनै पनि विवाद नरहेको भन्दै स्पष्टिकरण दिएको थियो । लगानीकर्ताहरुले आर्थिक विधेयकबाटै यो व्यवस्था हटाउनु पर्ने अडान लिए पछि अर्थमन्त्री डा. प्रकाशशरण महतले लगानीकर्ताहरुलाई तत्कालिन समयमा विश्वस्थ पारेका थिए ।
यहि कारणले गएका दिनमा दोहोरो अंकले सुधार भइरहेको नेप्से सूचक आज भने खासै बढ्न सकेन । करिव २ अर्ब ३६ करोडको कारोबार भएको छ । जम्मा १३७ वटा कम्पनीको शेयर मूल्यमा सुधार हुँदा ७४ वटा कम्पनीको शेयर मूल्यमा गिरावट देखिएको छ ।
सर्वाधिक धेरै युनिक नेपालको शेयर मूल्यमा सुधार देखिएको छ भने म्युचुअल फण्डमा भारी गिरावट देखिएको छ । बाणिज्य बैंक, पर्यटन, जीवन, निर्जीवन र म्युचुअल फण्डको सूचक घटेको छ ।
