काठमाडौं । लगानीकर्ताको मानसिकता अस्थिर हुँदा शेयर बजारमा तिव्र उतारचढाव देखिदै आएको छ । बजारले बढ्ने संकेत दिए पनि वास्तविकतामा भने बढ्न सकिरहेको छैन । प्राविधिक विश्लेषकहरुले शेयर बजारको आधार बलियो भएको र अवको यात्रा २२ सय अंक तर्फ रहेको विश्लेषण गरे पनि सुधार हुने छाटकाट देखिदैन ।
लगानीकर्ताहरु अझै पनि बजेट र मौद्रिक नीतिको पर्खाइमा छन् । यदि मौद्रिक नीति र बजेटले अपेक्षाकृत रुपमा अर्थतन्त्रालाई सुधार गराउने देखियो भने बजारले गति लिने विश्लेषकहरु बताउछन् । तर बजेटले अहिलेको आर्थिक मन्दीलाई समेट्न सकेन भने तत्काल बजार सुधार नहुने बजार विश्लेषकहरुको राय छ । यसले गर्दा पनि लगानीकर्ताहरु बजार सुधार भन्दा पनि नीतिगत व्यवस्थाहरु कस्तो आउछ भनेर पर्खिरहेका छन् ।
शेयर बजारलाई प्रत्यक्ष अप्रत्यक्ष प्रभाव पार्ने बैंक व्याजदर घट्दो क्रममा छ । बैंकहरुमा विस्तारै तरलता बढिरहेको छ । बैंकहरुले लगानीकर्ताहरुलाई शेयरधितोकर्जा प्रवाह गर्न थालिसकेका छन् । बजार मूल्य घटेको मौकामा बैंकहरुले शेयरधितोकर्जा प्रवाह गर्न थालेका हुन् ।
यहि कारणले पनि शेयर बजार दिन दिनै झिनो अंकले सुधार हुने क्रममा छ । यसै क्रममा आज सोमबार पनि नेप्से सूचक ८.१० अंकले सुधार भएको छ । सोमबार नेप्से सूचक १८९१.३१ अंकमा बन्द भएको छ । कारोबार रकम एक अर्ब २७ करोडमा झरेको छ । आइतबारको तुलनामा आज कारोबार रकममा गिरावट आएको हो ।
आज १३३ वटा कम्पनीको शेयर मूल्यमा सुधार हुँदा ७८ वटा कम्पनीको शेयर मूल्य भने घटेको छ । आज पनि सर्वाधिक धेरै शिवम सिमेन्टको ७ करोड ३४ लाख रुपैयाँको खरिद बिक्री भएको छ । बाणिज्य बैंक र व्यापार बाहेक सम्पुर्ण सूचकमा सुधार देखिएको छ ।
