काठमाडौं । नेपालमा बीमाको पहुँच ४४ दशमलव ५५ प्रतिशत जनसंख्यामा पुगेको छ । नेपाल बीमा प्राधिकरणका अनुसार चैत मसान्तसम्ममा म्यादी र बैदेशिक रोजगार बीमालेख सहित बीमाको पहुँच ४४ प्रतिशत पुगेको हो । गत आर्थिक वर्षको चैत मसान्तसम्ममा यस्तो पहुँच ३७ दशमलव ३५ प्रतिशत रहेको थियो ।
यस अवधिमा वैदेशिक रोजगार बीमालेख संख्या ७१ दशमलव १२ प्रतिशतले बृद्धि भएको छ । प्राधिकरणका अनुसार चालु आर्थिक वर्षको चैत मसान्तसम्ममा बेदशिक रोजगार बीमालेख संख्या १४ लाख ५९ हजार ३१५ रहेको छ । गत आर्थिक वर्षको सोही अवधिमा यस्तो बीमालेख ८ लाख ५२ हजार ८२७ रहेको थियो ।
त्यस्तै कुल जीवन बीमालेख संख्या भने २० दशमलव १४ प्रतिशतले बृद्धि भएको छ । चैत मसान्तसम्ममा एक करोड ४१ लाख ६५ हजार ९९८ वटा पोलिसी जारी भएका छन् । गत वर्षको यसै अवधिमा यस्तो पोलिसी १ करोड १७ लाख ९१ हजार ६९८ वटा जारी भएको थियो ।
नेपालमा संचालित कुल जीवन तथा निर्जीवन बीमा कम्पनीहरुले यस वर्षको चैत मसान्तसम्ममा कूल १ खर्ब ३४ अर्ब ७४ करोड ९६ लाख रुपैयाँ कूल बीमा शुल्क संकलन गरेका छन् । गत आर्थिक वर्षको यसै अवधिमा यी कम्पनीहरुले १ खर्ब ३१ अर्ब २४ करोड १३ लाख रुपैयाँ बीमा शुल्क संकलन गरेका थिए । गत वर्षको तुलनामा २ प्रतिशतले बीमा शुल्क संकलनमा बृद्धि भएको हो ।
तर, जीवन बीमा कम्पनीहरुले चालु आर्थिक वर्षको चैत महिनासम्ममा कूल एक खर्ब चार अर्ब ७३ करोड ४८ लाख रुपैयाँ बीमा शुल्क संकलन गरेका छन् । निर्जीवन बीमा कम्पनीहरुले ३० अर्ब एक करोड ४८ लाख रुपैयाँ बीमा शुल्क संकलन गरेका छन् ।
Monthly-overall-Report_Chitra-MoF2079_80
