काठमाडौं । काठमाडौं महानगरपालिकाले १५ दिनभित्र बिजुली, टेलिफोन, इन्टरनेट तथा केवललगायतको तार हटाउन निर्देशन दिएका छन् । पोलमा गुजुल्टो बनाएर राखेका, चुँडीएर तथा लत्रिएर सडकमा छरिएका तारहरुले सहरी सुन्दरतामा ह्रास आएको भन्दै महानगरले सेवा प्रदायक निकाय तथा सङ्घ संस्थालाई तार हटाउन निर्देशन दिएको हो ।
जथाभावि रुपमा राखिएको तारहरुका कारण आगलागीको जोखिम बढेको, सार्वजनिक आवागमनमा असर परेको हुँदा यसबाट हुन सक्ने जोखिम घटाउने विषयप्रति महानगरले विभिन्न सरोकारवाला तथा अधिकारीसँग व्यवस्थापनका लागि अनुरोध गरेको छ । सेवा प्रदायकलाई समन्वयन र सहजीकरणका लागि अनुरोध गरेपनि कुनै उपलब्धि नभएको भन्दै १५ दिनभित्र अनावश्यक तार केवल आफै हटाउन निर्देशन जारी गरेको हो ।
महानगरले तोकेको समयभित्र तार केवल हटाई आवश्यक तारलाई सङ्केत चिन्ह लगाउन समेत अनुरोध गरेको छ । तोकेको समयभित्र नहटाए महानगर स्वयमले हटाउने र यसबाट पर्न जाने असुविधाको जिम्मेवारी स्वयं सेवा प्रदायकको हुने छ ।
