काठमाडौं । शेयर बजार झिनो अंकले घटेर बन्द भएको छ । नेप्से सूचक ३.०७ अंकले घटेर १९०४.३८ अंकमा बन्द भएको हो । आज होटल, म्युचुअल फण्ड र निर्जीवन बीमाको सूचकमा सामान्य सुधार देखिएको छ भने बाँकी सूचक तथा उपसूचक तल झरेका छन् ।
१३८ वटा कम्पनीको शेयर मूल्य घट्दा ६२ वटा कम्पनीको शेयर मूल्यमा भने सुधार देखिएको छ । कालिञ्चोक दर्शन मैलुङ हाइड्रोपावरको शेयर मूल्य सर्वाधिक बढ्ने क्रममा सर्किट लागेको छ । बैंकिङ सूचकमा खासै उतारचढाव देखिदैन ।
लगानीकर्ताहरु अझै पर्ख र हेरको अवस्थामा छन् । बजार बढिहाल्छ भनेर गएको साता शेयर खरिद गर्नेहरु फसेका छन् । अहिले ठुलो लगानीकर्ताहरु खासै सक्रिय छैनन् । अल्पकालिन लगानीकर्ता मात्रै सक्रिय रहेकाले बजारमा उत्साह छैन ।
आर्थिक अवस्था अझै के हुन्छ भन्ने टुङ्गो लाग्न सकेको छैन । सूचीकृत कम्पनीहरुले अव तेस्रो त्रैमाशिक वित्तीय विवरण सार्वजनिक गर्न थाल्ने छन् । अहिलेको आर्थिक अवस्था हेर्दा कसैको पनि मुनाफामा उल्लेख्य सुधार हुने देखिदैन । यसले गर्दा पनि बजारमा लगानीकर्ताको लगानी बढाउन चाहिरहेका छैनन् ।
