काठमाडौं । शेयर बजारले अर्थमन्त्रीमा डा. प्रकाशशरण महतको इन्ट्रिलाई नकारात्मक प्रतिकृया जनाएको छ । शुक्रवार अर्थमन्त्रीमा डा. महतको प्रवेश सँगै शेयर बजार बढ्ने अपेक्षा गरिएको थियो । तर आइतबार र सोमबार नै लगातार शेयर बजारमा गिरावट देखिएको छ । आइतबार २० अंकले घटेकोमा आज सोमबार पनि १६.९१ अंकको गिरावट देखिएको छ ।
डा. महत अर्थमन्त्रीमा नियुक्त हुँदा शेयर बजार सुधार हुने अपेक्षा गरिएको थियो । अर्थशास्त्री महतले नेपालको अर्थतन्त्रमा राम्रो योगदान पुर्याउन सक्ने आकलन गरिए पनि उनको नियुक्ति प्रकरण र उनको विगतको इतिहासलाई हेर्दा उनि देउवा परिवार प्रति नै वफादार हुने भन्दै लगानीकर्ताको उनि प्रति विश्वास बढ्न नसकेको हो ।
सोमबार नेप्से सूचक १६.९१ अंकले घटेर १८७१.८८ अंकमा रोकिएको छ । सूचक सँगै कारोबार रकम पनि घटेको छ । कारोबार ९२ करोड २ लाख रुपैयाँमा सिमित भएको छ । आज १७३ वटा कम्पनीको शेयर मूल्य घटेको छ भने ३३ वटा कम्पनीको मूल्यमा सुधार आएको छ । आज सर्वाधिक धेरै कालिञ्चोक दर्शनको शेयर मूल्यमा सकारात्मक सर्किट लागेको छ । सर्वाधिक धेरै नविल बैंकको तीन करोड ६२ लाख रुपैयाँको कारोबार भएको छ ।
