काठमाडौं । साताको अन्तिम दिन नेप्से सूचक ६.१४ अंकले घटेर १९३२.४८ अंकमा रोकिएको छ । सुस्ताएको शेयर बजारमा कारोबार रकम पनि घटेको छ । आज जम्मा एक अर्ब १२ करोडको मात्रै खरिद बिक्री भएको छ । ८१ वटा कम्पनीको शेयर मूल्यमा सुधार आउदा १२६ वटा कम्पनीको शेयर मूल्य भने घटेको छ ।
युनिक नेपाल लघुवित्त र शुभव पावरको शेयर मूल्यमा सर्वाधिक धेरै सुधार हुँदा सकारात्मक सर्किट लागेको छ । सर्वाधिक धेरै एनआइसी एशियाको ४ करोड ९३ करोड रुपैयाँको खरिद बिक्री भएको छ । आज हाइड्रोपावर, इन्भेष्टमेन्ट, अन्य सूचक र व्यापरको सूचक बाहेक सबै सूचक तल झरेका छन् ।
सम्पुर्ण आर्थिक सूचक सुधारोन्मुख देखिए पनि बजारमा खासै प्रभाव पार्न सकेको छैन । भोलि उपराष्ट्रपतिको निर्वाचन हुँदैछ । निर्वाचन अगाडी नै सत्ता समिकरण परिवर्तन हुने हो कि भन्ने अन्योलताले पनि शेयर बजारमा खासै सुधार हुन सकेको छैन । अर्थमन्त्रीमा अझै पनि को आउने भन्ने अन्योलता कायमै छ । बजारले बलियो र बजार बुझ्ने अर्थमन्त्री खोजिरहेको छ । जवसम्म राजनीतिक गतिविधि स्पष्ट हुँदै तवसम्म बजार स्थिर हुने देखिदैन ।