काठमाडौं । ईङवा हाइड्रोपावर लिमिटेडले आयोजना प्रभावित क्षेत्र परिवर्तन गरेको छ । कम्पनीले फागुन २१ गतेदेखि निष्काशन गरेको पहिलो चरणको आइपीओ खरीदका लागि आवेदन दिने स्थानीयको क्षेत्र परिवर्तन गरेको हो ।
फागुन २१ गते बसेको कम्पनीको सञ्चालक समिति बैठकले पाँचथर जिल्ला याङ्वरक गाउँपालिका वडा नम्बर २ (साविक फलैचा गाविस वडा नम्बर १ देखि ९ सम्म), याङ्वरक गाउँपालिका वडा नम्बर ३ (साविक ओयाम गाउँ विकास समिति नम्बर १ देखि ९ सम्म) र ताप्लेजुङ जिल्ला सदिङ्गवा गाउँपालिका (साविक आङखोप गाउँ विकास समिति वडा नम्बर १ देखि ९ सम्म) का स्थानीयमा आईपीओ जारी गर्ने निर्णय गरेको हो ।
कम्पनीले पहिलो चरणमा आयोजना प्रभावित क्षेत्रका स्थानीय बासिन्दासँगै वैदेशिक रोजगारीमा रहेका नेपाली कामदारका लागि पनि आइपीओ निष्कासन गरेको हो । कम्पनीले ६ लाख कित्ता आइपीओ आयोजना प्रभावित क्षेत्रका बासिन्दाका लागि र १ लाख २० हजार कित्ता वैदेशिक रोजगारीमा रहेका नेपाली कामदारका लागि निष्कासन गरेकोे हो ।
आइपीओ निष्कासनका लागि गराएको रेटिङमा केयर रेटिङ नेपालले कम्पनीलाई केयर एनपी डबल बी इस्युअर रेटिङ प्रदान गरेको छ । यसले कम्पनीको वित्तीय दायित्व वहन गर्ने क्षमतामा मध्यम जोखिम रहेको संकेत गर्दछ ।
आइपीओमा न्यूनतम १० कित्तादेखि अधिकतम २० हजार कित्ताका लागि आगामी चैत ८ गतेसम्म आवेदन दिन सकिनेछ । कम्पनीको शेयर निष्कासन तथा विक्री प्रबन्धकमा नेपाल एसबिआई बैंकिङ लिमिटेड रहेको छ । आयोजना प्रभावित क्षेत्रका बासिन्दाले नेपाल एसबिआई बैंक, सिद्धार्थ बैंक, लक्ष्मी बैंक, सिभिल बैंक, सप्तकोशी विकास बैंकका तोकिएका शाखा कार्यालयबाट आवेदन दिन सक्नेछन् ।
त्यसैगरी वैदेशिक रोजगारीमा रहेको नेपालीले भने नेपाल धितोपत्र बोर्डबाट स्वीकृति प्राप्त सम्पूर्ण आस्बा सदस्य बैंक तथा वित्तीय संस्थाहरू र तिनका तोकिएका शाखा कार्यालयहरूबाट सी(आस्बा प्रणालीमार्फत आवेदन दिन सक्नेछन् ।
कम्पनीले ताप्लेजुङ जिल्लामा ९ दशमलव ७ मेगावाट क्षमताको ईङवा खोला साना जलविद्युत् आयोजना निर्माण गरिरहेको छ ।
