काठमाडौं । सुपर मादी हाइड्रोपावर लिमिटेडको आइपीओमा आज अन्तिम दिन साढे १३ लाखको आवेदन परेको छ । सिडिएसिका अनुसार कम्पनीको आइपीओमा आज बिहीबार ५ बजेसम्ममा १३ लाख ५७ हजार ७४५ जना आवेदकले १ अर्ब ५५ करोड ६२ लाख २१ हजार रुपैयाँ बराबरको १ करोड ५५ लाख ६२ हजार २१० कित्ता शेयर खरिदको लागि आवेदन परेको हो ।
कम्पनीले जारी पूँजीको १० प्रतिशत अथार्त २१ करोड रुपैयाँ बराबरको २१ लाख कित्ता शेयर सर्वसाधारणमा निष्काशन गर्न छुट्याएको थियो। सोमध्ये २ लाख १० हजार कित्ता वैदेशिक रोजगारीमा रहेको नेपालीहरुका लागि र १ लाख ५ हजार कित्ता शेयर सामूहिक लगानी कोषहरुको बाँडफाँड गरिएको छ। त्यसका साथै ४२ हजार कित्ता कम्पनीका कर्मचारीहरुका लागि छुट्याइएको छ। बाँकी १७ लाख ४३ हजार कित्ता सर्वसाधारण लगानीकर्ताको लागि बिक्रीमा ल्याएको थियो।
कम्पनीको शेयर निष्काशन तथा बिक्री प्रबन्धक सानिमा क्यापिटल लिमिटेड रहेको छ। आइपीओ निष्काशनका लागि गराएको रेटिङ्गमा इक्रा नेपालले कम्पनीलाई इक्राएनपी आईआर डबल बी रेटिङ्ग प्रदान गरको छ। यसले कम्पनीको वित्तीय दायित्व बहन गर्ने क्षमतामा मध्यम जोखिम रहेको संकेत गर्दछ।
यस कम्पनीले कास्की जिल्लाको मादी गाउँपालिकाको सिमाना भएर बग्ने मादी नदीको बहाव सदुपयोग हुने गरी ४४ मेगावाट क्षमताको सुपार मादी जलविद्युत आयोजना निर्माण गरिरहेको छ।
