काठमाडौं । कालिञ्चोक दर्शन लिमिटेडको आइपीओ पुस २० गते बुधवार बाँडफाँड हुँदैछ । कम्पनीले पहिलो चरणमा आयोजना प्रभावित स्थानीय र वैदेशिक रोजगारीमा रहेका नेपालीको लागि विक्री गरेको आइपीओ बाँडफाँड गर्न लागेको हो ।
पुस १८ गते नै प्रि–अलोटमेन्ट गरिसकेको यस आइपीओको अन्तिम बाँडफाँड भने पुस २० गते दिउँसो ३ः३० बजे गर्ने जनाएको छ । विक्री प्रबन्धक नबिल इन्भेष्टमेन्ट बैंकिङ लिमिटेडको नारायणचौर नक्सालमा रहेको कार्यालयमा आइपीओ बाँडफाँड गर्ने जनाएको छ ।
कम्पनीले गत मंसिर १४ गतेदेखि २८ गतेसम्म आइपीओ जारी गरेको थियो । कम्पनीले १ लाख २० हजार कित्ता शेयर आयोजना प्रभावित स्थानीय बासिन्दामा र १ लाख ८ हजार कित्ता शेयर वैदेशिक रोजगारीमा रहेका नेपालीहरूका लागि विक्री गरेको थियो ।
कम्पनीको आइपीओ खरीदका लागि वैदेशिक रोजगारीमा गएका ६ हजार ६११ जना नेपालीले आवेदन दिएको विक्री प्रबन्धकको भनाइ छ ।स्थानीयबाट १५ हजार ४०० जनाको आवेदन प्राप्त भएको विक्री प्रबन्धकले जनाएको छ ।
