काठमाडौं। नेपाल धितोपत्र बोर्डले पाँच वटा कम्पनीलाई आइपीओ निष्काशनको लागि अनुमति दिएको छ । बोर्डले एशियन हाइड्रोपावर, सुपरमाई हाइड्रोपावर, सुपर मादी हाइड्रोपावर, माया खोला हाइड्रोपावर र शुभम पावर लिमिटेडलाई आइपीओ निष्काशनको अनुमति दिएको हो।
यी पाँच कम्पनीहरुले आयोजना प्रभावित र सर्वसाधारणका लागि आइपीओ निष्काशन गर्न लागेका हुन् । एशियन हाइड्रोपावरले १०० रुपैयाँ अंकित दरमा कुल ३४ लाख कित्ता आइपीओ निष्काशन गर्न लागेको हो । कम्पनीको आइपीओ निष्काशन तथा विक्री प्रबन्धकमा एनएमबि क्यापिटल रहेको छ।
त्यसैगरी सुपरमाई हाइड्रोपावरले १०० रुपैयाँ अंकित दरमा कुल ५० लाख कित्ता आइपीओ निष्काशन गर्न लागेको हो । कम्पनीको विक्री प्रबन्धकमा सानिमा क्यापिटल रहेको छ।
सुपर मादी हाइड्रोपावरले २ करोड १० लाख कित्ता आइपीओ निष्काशन गर्न लागेको हो । कम्पनीको आइपीओ निष्काशन तथा विक्री प्रबन्धकमा सानिमा क्यापिटल रहेको छ। माया खोला हाइड्रोपावरले कुल १ करोड कित्ता आइपीओ निष्काशन गर्न लागेको हो । कम्पनीको आइपीओ विक्री प्रबन्धकमा प्रभु क्यापिटल रहेको छ।
त्यस्तै, शुभम पावर कम्पनीले अंकित मूल्य १०० रुपैयाँ दरका कुल ४ लाख कित्ता आइपीओ निष्काशन गर्न अनुमति पाएको हो । आइपीओ निष्काशन तथा विक्री प्रबन्धकमा मुक्तिनाथ क्यापिटल रहेको छ।
एशियन हाइड्रोपावरले कार्तिक २९ गते बोर्डबाट अनुमति पाएको हो भने बाँकी चार कम्पनीले मंसिर १ गते बोर्डबाट आइपीओ निष्काशनको अनुमति पाएका हुन् ।
