काठमाडौं । चुनाव अगाडी शेयर बजार बढ्दो लयमा देखिएको छ । चुनाव पछि बैंकिङ तरलता सहज हुने र नयाँ नेतृत्व आउने कुराले लगानीकर्ताको मनोविज्ञान बढ्दा आज एकै दिन २५ अंकको सुधार देखिएको छ ।
चुनावमा कालो धन र लुकाएको पैसा बाहिर आउने हुँदा बैंकिङ तरलता सहज हुने विश्लेषण गरिएको छ । तरलता सहज भए सँगै व्याजदर घट्नेछ । व्याजदर घट्ने वित्तीकै शेयर बजारमा सुधार आउने विश्लेषकहरु बताउछन् ।
यहि मंसिर ४ गते प्रतिनिधिसभा र प्रदेश सभाको निर्वाचन हुँदैछ । निर्वाचन पछि नयाँ नेतृत्व आउने र अहिलेको आर्थिक संकटलाई संबोधन गर्ने विश्लेषण गरिएको छ । अवको निर्वाचित सरकारको पहिलो एजेण्डा नै देशलाई आर्थिक संकटबाट बचाउनु पर्नेछ ।
नेपाल राष्ट्र बैंकले सार्वजनिक गरेको चालु आर्थिक वर्षको तीन महिनाको आर्थिक समिक्षामा रेमिट्यान्सदेखि लिएर विओपी बढेको पाइएको छ । विदेशी मुद्राको संञ्चिति सँगै अर्थतन्त्रमा सकारात्मक संकेत देखा परेको छ । सँग सँगै विदेशिनेको संख्या बढिरहेको छ भने रेमिट्यान्स पनि बढेको छ ।
चुनावका कारण नेपाल धितोपत्र बोर्डले ब्रोकर लाइसेन्स, नयाँ एक्सचेन्जको लाइसेन्स रोकेर राखेको छ । चुनाव पछि नयाँ नेतृत्व आउने र सोहि सरकारको तजविजमा बाँकी प्रकृयाँ अगाडी बढ्ने भएकाले पनि ब्रोकरहरु अहिलेसम्म ढुक्क भएर बसेका छन् ।
चुनाव पछि बजारमा तरलता बढ्ने चर्चाले निष्कृय रहेका लगानीकर्ता पनि बजारमा जुर्मुराउन थालेका छन् । यसै क्रममा चुनाव अगाडीको अन्तिम कारोबार दिनमा एक अर्ब ७१ करोडको कारोबार भएको छ । नेप्से सूचक २५ दशमलब ५७ अंकले बढेर १९३६ दशमलब ८३ अंक कायम भएको छ । १३२ वटा कम्पनीको शेयर मूल्यमा सुधार आउदा १३ वटाको मूल्य घटेको छ ।
सिक्लेस हाइड्रोपावर र सयपत्री हाइड्रोपावरको शेयर मूल्यमा सकारात्मक सर्किट लागेको छ । सर्वाधिक धेरै फर्वार्ड माइक्रोफाइनान्सको शेयर मूल्यमा गिरावट आएको छ । सबैभन्दा धेरै रिडी हाइड्रोपावरको १४ करोडको कारोबार भएको छ ।
