काठमाडौं । यमपञ्चकको अन्तिम दिन अर्थात कात्तिक शुक्ल द्धितीय तिथिको दिन सप्तरंगी टिकाको साथ मनाइदैछ । यो पर्व मुख्यत दिदीले भाईलाई र बहिनीले दाइलाई र भाईले दिदीलाई दाईले बहिनीलाई निधारमा सप्तरंगी टिका लगाएर पूजाआजा गरि मनाइन्छ । तसर्थ आजको दिनलाई भाईतिहार अर्थात किजा पूजाको दिन भनिन्छ ।
यो दिन दिदीबहिनीले दाजुभाईका लागि विशेष खानेकुराको व्यवस्था गरेको हुन्छ । पूजाआजा सकेपछि दाजुभाईलाई तिनै मिष्ठान्न भोजन गराइन्छ । साथै दाजुभाईले दिदीबहिनीलाई दान दक्षिणा र उपहार दिने चलन पनि रहेको छ । यसरी दिर्घायुको कामना गरि लगाइने भाईटिकाले दाजुभाई दिदीबहिनीबीचको मायालाई थप प्रगाढ बनाउने गर्दछ ।
धार्मिक विश्वास अनुसार परापूर्वकालमा बहिनी यमुनाले आजकै दिन आफ्नो दाजु यमराजलाई विशेष मानसम्मानका साथ पूजा आज गरेको भन्ने गरिन्छ । यमपञ्चकको पाँच दिन यमराजले यमुनाको घरमा बास गर्छ भन्ने विश्वास रहेको छ । यी पाँच दिन इन्द्रादि दशा दिक्पालले बलि राजाका लागि आफ्नो राज्य छाड्ने कथन पनि रहेको छ ।
भाइटिकाको दिन यसरीे पूजाआजा गर्दा दाजुभाईले दिर्घ जीवन बाँच्छन् भन्ने मान्यता रहेको छ । यो दिन दियो बालेर कलश र गणेशको पूजा गर्ने, बिमिरो, ओखर, तेल, कहिल्यै नओइलाउने मखमलीको माला, दूबोको टिका, कटुस इत्यादि राखेर पूजा गरिन्छ । पूजा गरेपछि सातवटा रंगको टिका निधारमा लगाइन्छ । यसरी दिदीबहिनीले पूजाआजा गर्दा दाजुभाई कालको मुखबाट जोगिएर आउने, आरोग्य र दिर्घ जीवन बाँच्ने विश्वास पनि रहेको छ ।
