काठमाडौं । शेयर बजारमा चरम मन्दी छाएको छ । पछिल्ला दिनमा शेयर मात्रै तल झरिरहेको छैन कारोबार रकम पनि घटिरहेको छ । बजार अझै केहि समय तल्लो विन्दुमै रहने विश्लेषण सहित लगानीकर्ताको सहभागिता घटेको छ ।
भदौ लागे सँगै बैंकिङ प्रणालीमा तरलता सहज हुन्छ भन्ने अपेक्षा गरिएकोमा सिडी रेसियो झन् झन् टाइट भइरहेको छ । यहि हिसावले सिडी रेसियो टाइट हुँदै जाने हो भने अवको दुई तीन सातामै बैंकहरु नयाँ कर्जा प्रवाह गर्नै नसक्ने अवस्थामा पुग्नेछन् । बैंकहरुले नयाँ कर्जा प्रवाह गर्न नसक्नु भनेको शेयर बजारमा जाने कर्जामा कटौती हुनु हो । अर्को तर्फ प्राथमकिताका क्षेत्रमै कर्जा प्रवाह हुन नसकेको अवस्थामा शेयर बजारमा कर्जा लिइ लिइ लगानी गर्ने कुरा आउदैन ।
मंगलबार नेप्से सूचक २.१९ अंकले मात्रै सुधार भएको छ । तिब्र उतारचढावका विचमा नेप्से सूचक अन्तिममा सुधार भएको हो । नेप्से सूचक सामान्य सुधार हुँदा १९९५.२१ अंकमा रोकिएको छ । कारोबार रकम एक अर्ब एक करोड रुपैयाँको भएको छ । आज २२६ वटा कम्पनीको शेयर खरिद बिक्री हुँदा जम्मा ७४ वटाको सुधार भएको छ भने १०५ वटाको शेयर मूल्य घटेको छ । सर्वाधिक धेरै अपर हेवाखोला हाइड्रोपावरको शेयर मूल्य ८.४५ प्रतिशतले बढेर ३८५ रुपैयाँ पुगेको छ । नेपाल टेलिकमको सबैभन्दा धेरै ९ करोड ९७ लाख रुपैयाँको खरिद बिक्री भएको छ ।
